Özəl baxça seçərkən bunlara mütləq diqqət edin - Valideynlərin nəzərinə
Ölkədə özəl uşaq bağçalarına qəbul prosesi başlayır. Son illərdə dövlət bağçalarında yerlərin məhdud olması səbəbindən valideynlərin xeyli hissəsi övladlarının məktəbəqədər təhsilini özəl bağçalara həvalə edir. Bununla yanaşı, son aylarda bəzi özəl bağçalardan gələn narazılıqlar, uşaqlarla davranış, təhlükəsizlik, qidalanma və xidmət keyfiyyəti ilə bağlı yayılan məlumatlar valideynlərin narahatlığını artırıb.
Belə bir şəraitdə bağça seçimi təkcə qiymətə və ya yerləşdiyi əraziyə görə deyil, həm də müəssisənin etibarlılığı, təhlükəsizlik standartları və təhsil mühiti nəzərə alınmaqla aparılmalıdır. Bəs valideynlər övladlarını özəl bağçaya yazdırarkən hansı məqamlara xüsusi diqqət yetirməlidirlər? Etibarlı bağçanı digərlərindən fərqləndirən əsas meyarlar hansılardır?
Mövzu ilə bağlı təhsil eksperti Elçin Əfəndi Crossmedia.az-a açıqlama verib:
“Özəl bağçalarda uşaqların qəbulu prosesi həyata keçirilir və bu məsələ ilə bağlı yaxın günlərdə elm və təhsil naziri tərəfindən də müvafiq açıqlama verilib. Bildirilib ki, dövlət-özəl tərəfdaşlığı çərçivəsində cənab Prezidentin müvafiq sərəncamına uyğun olaraq, özəl bağçalarda təhsil alan uşaqların təhsil haqqının müəyyən hissəsi dövlət vəsaiti hesabına qarşılanacaq. Əlbəttə ki, bu qərar məktəbəqədər təhsil almaq istəyən, lakin dövlət bağçalarında yer tapa bilməyən uşaqlar üçün özəl bağçalarda təhsil almaq imkanı yaradır. Bu baxımdan qərar məktəbəqədər təhsilin əlçatanlığının artırılması istiqamətində olduqca mühüm addımdır”.
Valideynlər özəl bağça seçərkən ilk növbədə həmin müəssisənin dövlət-özəl tərəfdaşlığı proqramına daxil olub-olmamasına diqqət yetirməlidirlər. İkinci növbədə isə bağçanın uzunmüddətli fəaliyyəti, fəaliyyəti dövründə hər hansı ciddi nöqsan və ya qanun pozuntusuna yol verilib-verilməməsi araşdırılmalıdır. Bununla yanaşı, valideynlər bağçada uşaqlar üçün yaradılmış şəraitlə də yerində tanış olmalıdırlar. Otaqların vəziyyəti, yataq şəraiti, qidalanma, gigiyenik mühit, təhlükəsizlik tədbirləri, tədris və oyun otaqlarının vəziyyəti xüsusi diqqətlə qiymətləndirilməlidir. Yalnız bütün bu sadalanan meyarlara cavab verən, infrastruktur baxımından müasir və təhlükəsiz şəraitə malik olan özəl bağçalar valideynlər tərəfindən seçim üçün nəzərdən keçirilməlidir”.
Ayhan
16:30 05.08.2026
Oxunuş sayı: 55
