Özəl bağçalar üçün maliyyələşmə müsabiqəsi elan edildi
Elm və Təhsil Nazirliyi məktəbəqədər təhsil sahəsində valideyn-dövlət-özəl əməkdaşlığına əsaslanan maliyyələşmə müsabiqəsi elan edib.
Crossmedia.az xəbər verir ki, Elm və Təhsil Nazirliyi bu barədə məlumat yayıb. Bildirilib ki, müsabiqə Nazirlər Kabinetinin 17 iyul 2026-cı il tarixli 218 nömrəli qərarının icrası çərçivəsində keçirilir və əsas məqsəd 2026/2027-ci tədris ilində məktəbəqədər təhsilin əhatə dairəsini genişləndirməkdir.
Müsabiqədə "Lisenziyalar və icazələr haqqında" Qanuna uyğun olaraq məktəbəqədər təhsil fəaliyyəti üçün lisenziyaya malik özəl təhsil müəssisələri iştirak edə bilərlər.
Sənəd qəbulu 5 avqust–20 avqust 2026-cı il tarixlərində həyata keçiriləcək. Müraciətlər anket.edu.az platforması vasitəsilə qəbul olunacaq.
Nazirlik qeyd edib ki, müsabiqənin keçirilmə qaydaları, tələb olunan sənədlər, layihələrin qiymətləndirilməsi meyarları və digər şərtlər müvafiq sənəddə əks olunub.
Qeyd edək ki, layihə çərçivəsində 2026/2027-ci tədris ili ərzində özəl məktəbəqədər təhsil müəssisələrində 8 min uşağın təhsilinin maliyyələşdirilməsi nəzərdə tutulur.
17:51 04.08.2026
Oxunuş sayı: 328
