İxtisas seçimində yeni imkanlar: Abituriyentlər nələrə diqqət etməlidir?
Bu il ali təhsil müəssisələrinə ixtisas seçimi qaydalarında tətbiq olunan yeniliklər, xüsusilə 150–200 bal toplayan abituriyentlər üçün əlavə seçim imkanları yaradıb. Dövlət İmtahan Mərkəzinin açıqladığı dəyişikliklər fonunda abituriyentlərin düzgün ixtisas seçimi etməsi, gələcək karyera imkanlarını və əmək bazarındakı tələbatı nəzərə almaları əsas məsələlərdən biri kimi qiymətləndirilir.
Mövzu ilə bağlı təhsil eksperti Elçin Əfəndi Crossmedia.az-a açıqlamasında bildirib ki, bəzi ixtisasların 150 ballıq ixtisas siyahısına əlavə edilməsi abituriyentlər üçün müsabiqədə iştirak imkanlarını genişləndirir:
"Dövlət İmtahan Mərkəzinin açıqladığı ümumi statistika və bəzi ixtisasların 150 ballıq ixtisas siyahısına əlavə edilməsi, xüsusilə ödənişli əsaslarla abituriyentlərə qəbul imkanları yaradır. Ən azı müəyyən mərhələdə müsabiqədə iştirak etmək imkanı verir. Bu da müsbət qiymətləndirilə bilər".
Ekspert qeyd edib ki, abituriyentlər ixtisas seçimi zamanı yalnız keçid ballarını deyil, bir sıra vacib amilləri də nəzərə almalıdırlar:
"Abituriyentlər seçim edərkən illik təhsil haqlarına, ixtisasların əmək bazarında tələbatına, beynəlxalq səviyyədə tanınmasına, eləcə də gələcəkdə həmin ixtisas üzrə fəaliyyət göstərmək imkanlarına diqqət yetirməlidirlər. Bütün bu amillər nəzərə alınmalıdır ki, onlar seçim zamanı hər hansı səhvə yol verməsinlər".
E.Əfəndinin sözlərinə görə, universitet seçimi zamanı məsafə amili də nəzərə alınmalıdır:
"Logistika məsələsinə də diqqət yetirmək lazımdır. Daha uzaq məsafədə yerləşən universitetlərdənsə, yaxın məsafədə olan ali təhsil müəssisələrinin seçilməsi daha məntiqli və məqsədəuyğundur. Təbii ki, istisna hallar da ola bilər. Məsələn, hansısa universitet keyfiyyətli təhsil təqdim etdiyi üçün abituriyent həmin ali məktəbdə təhsil almaq istəyirsə, bu, ayrıca yanaşmadır".
Zərnigar Hüseynli
13:30 01.08.2026
Oxunuş sayı: 68
