Magistraturaya qəbulda yerlər boş qalır: Çıxış yolu nədir?
Magistraturaya qəbul imtahanlarının nəticələri hər il ali təhsil sistemində mövcud vəziyyətin qiymətləndirilməsi baxımından mühüm göstəricilərdən biri hesab olunur. Bu prosesdə namizədlərin sayı, qəbul göstəriciləri və plan yerlərinin doluluq səviyyəsi əsas müzakirə mövzularından birinə çevrilir. Son nəticələr isə magistratura təhsilində müəyyən dəyişikliklərə ehtiyac olduğunu bir daha gündəmə gətirib.
Mövzu ilə bağlı təhsil eksperti Elçin Əfəndi Crossmedia.az-a bildirib ki, magistraturaya qəbul imtahanlarının nəticələrinin təhlili zamanı mövcud plan yerləri ilə müqayisədə iştirakçı sayının kifayət qədər aşağı olduğu müşahidə edilir:
"İmtahan mərhələsində 27 mindən çox namizəd iştirak etmişdi, amma onların cəmi 13 mindən bir qədər artığı qəbul olundu. Təxminən 4 minə yaxın plan yeri boş qalıb və bu da magistratura istiqamətində müəyyən məsələlər üzərində düşünməyə vadar edir".
Ekspertin fikrincə, qəbul prosesində müəyyən dəyişikliklərin aparılmasına ehtiyac var:
"Biz təbii ki, imtahan suallarının müəyyən qədər asanlaşdırılması, daha çox tələbat olan sahələrin plan yerlərinin artırılması, az üstünlük verilən sahələrin plan yerlərinin isə azaldılması kimi təklifləri veririk. Hesab edirəm ki, bunlar tətbiq olunmalıdır".
Mütəxəssis qeyd edib ki, hazırkı vəziyyətdə tələbələrin hazırlıq səviyyəsi və qəbul prosesində ildən-ilə baş verən dəyişikliklər nəticələrə təsir göstərir:
"Xüsusən də xarici dil fənn bloku ilə bağlı imtahan nəticələri də ümumi göstəricilərə öz təsirini göstərmiş olur. Düşünürəm ki, bu məsələlər növbəti dövr ərzində aradan qaldırılmalıdır ki, iştirakçılar üçün qəbul prosesi bir qədər əlçatanlaşsın".
Zərnigar Hüseynli
18:30 30.07.2026
Oxunuş sayı: 36
