Mədəniyyət

Azərbaycanlı tələbələr Türkiyədə abidələrin bərpası prosesini əyani şəkildə izləyiblər

Ölkəmizdə gənclərin müasir dövrün çağırışlarına uyğun bilik və bacarıqlara yiyələnməsi Prezident İlham Əliyevin daim diqqət mərkəzindədir. Eyni zamanda, mədəniyyət sahəsi üzrə çalışan və təhsil alanların da müvafiq istiqamətlər üzrə mütərəqqi beynəlxalq təcrübəyə sahib olmasına önəm verilir.

Dövlət başçısının bu sahəyə xüsusi yanaşmasının nəticəsidir ki, 2024/2025-ci tədris ilindən başlayaraq Bakı Dövlət Universitetinin (BDU) Hüquq fakültəsinin magistratura pilləsində “Mədəniyyət hüququ” ixtisaslaşması üzrə kadr hazırlığı həyata keçirilir. Mədəniyyət Nazirliyinin təşkilatçılığı ilə bu ixtisas üzrə təhsil alan magistrantların bilik və bacarıqlarının artırılması məqsədilə onların bir qrupu Türkiyəyə ezam olunub.

Crossmedia.az xəbər verir ki, layihə Azərbaycan-Türkiyə Mədəniyyət üzrə Birgə Komissiyasının Ankara və Bakı şəhərlərində reallaşan iclaslarında əldə edilmiş razılığa uyğun olaraq həyata keçirilir.

BDU-nun magistrantları Türkiyə Mədəniyyət və Turizm Nazirliyinin Hüquq müşavirliyi və Mədəni sərvətlərin bərpası üzrə laboratoriyaların fəaliyyəti ilə yaxından tanış olublar. Tələbələr abidələrin bərpa və konservasiyası, qorunması sahəsində Türkiyənin qabaqcıl mütəxəssisləri görüşüb, laboratoriyalarda bərpa prosesini əyani şəkildə izləyiblər. Bundan əlavə, proqram çərçivəsində tələbələr mədəniyyət sərvətlərinin ölkədən qanunsuz çıxarılması və gətirilməsinin qarşısının alınmasına yönələn UNESCO-nun 1970-ci il Konvensiyasının tətbiqi ilə bağlı məlumat alıblar.

Səfər çərçivəsində magistrantlar, həmçinin Türkiyə inzibati məhkəmə orqanı – Danıştay, Ankara Bölgə İdarə Məhkəməsi və ölkəmizin Türkiyədəki səfirliyinin tabeliyindəki Azərbaycan Mədəniyyət Mərkəzində də olublar. Onlar qurumların fəaliyyəti ilə yaxından tanış olmaq imkanı qazanıblar.