Muzey Mərkəzində pianoçu Nərgiz Əliyarova ilə görüş olub
Dekabrın 21-də Azərbaycan Musiqi Mədəniyyəti Dövlət Muzeyində tanınmış pianoçu Nərgiz Əliyarova ilə görüş keçirilib.
Crossmedia.az xəbər verir ki, görüşdə tanınmış pianoçu yaradıcılıq həyatından danışıb, tamaşaçıların suallarını cavablandırıb, bir neçə musiqi əsərini ifa edib. Tədbir zamanı, həmçinin pianoçunun Arif Məlikovun “Məhəbbət əfsanəsi” baletindən musiqi parçasını ifa etdiyi kliplər nümayiş olunub.
Tədbir çərçivəsində Nərgiz Əliyarova pianoçu kimi başladığı yaradıcılıq yolunu əks etdirən bütün materialları muzeyə hədiyyə edib. Onlar muzeyin arxivində saxlanılacaq və tematik sərgilərdə nümayiş etdiriləcək.
Professor Nərgiz Əliyarova Azərbaycanın Əməkdar artisti, “National Music & Global Culture Society” (Milli Musiqi və Qlobal Mədəniyyət Cəmiyyətinin) prezidenti, Beynəlxalq Bəstəkarlar Müsabiqəsinin təsisçisidir. Son yeddi ili pianoçu ABŞ-da yaşayır və işləyir. Bakıya gələrək o, dekabrın 20-də Müslüm Maqomayev adına Azərbaycan Dövlət Akademik Filarmoniyasında müəllim və ifaçı Elmira Səfərovanın 90 illik yubileyinə həsr olunmuş konsertdə iştirak edib.
15:26 21.12.2024
Oxunuş sayı: 14001
