Nazir: "Müxtəlif xalqlara məxsus mədəni mirasın qorunması ölkəmizin prioritet istiqamətlərindəndir"
Multikultural ölkə olan Azərbaycanda müxtəlif xalqlara və dinlərə məxsus mədəni mirasın qorunması, təmir və bərpası bu sahədə dövlət siyasətinin prioritet istiqamətlərindədir.
Crossmedia.az Mədəniyyət Nazirliyinə istinadən xəbər verir ki, bunu mədəniyyət naziri Adil Kərimli Mədəni Mülkiyyətin Qorunması və Bərpasının Öyrənilməsi üzrə Beynəlxalq Mərkəzinin (ICCROM) baş direktoru Aruna Françeska Maria Gujral ilə görüşündə deyib.
ICCROM-un baş direktoru Azərbaycanın bir sıra dinlərə mənsub yerli və beynəlxalq səviyyə abidələrin, ziyarətgahların bərpasına göstərdiyi diqqətdən danışıb:
"Azərbaycan həm dövlət səviyyəsində, həm də Birinci vitse-prezident Mehriban xanım Əliyevanın rəhbəri olduğu Heydər Əliyev Fondunun xətti ilə bir sıra dinlərə mənsub yerli və beynəədlxalq səviyyə abidələrin, ziyarətgahların bərpasına mühüm töhfələr verir".
Aruna Françeska Maria Gujral noyabr ayında Bakıda təşkil olunan BMT-nin İqlim Dəyişmələri üzrə Çərçivə Konvensiyası Tərəflər Konfransının 29-cu sessiyasında (COP29) iştirakından və keçirdiyi görüşlərdən məmnunluğunu bildirib.
O, Azərbaycanın bu mötəbər tədbirə yüksək səviyyədə ev sahibliyi etdiyini, COP29-un uğurla nəticələndiyini deyib.
Görüşdə Azərbaycan və ICCROM-un əməkdaşlığı ilə bağlı müzakirə aparılıb.
10:36 20.12.2024
Oxunuş sayı: 4419
