Beynəlxalq təcrübənin yerli təhsil sisteminə tətbiqi
Azərbaycan Dövlət Pedaqoji Universitetinin Quba filialının direktoru Yusif Alıyev Crossmedia.az-a verdiyi açıqlamada İkinci Təhsil Menecerləri Forumunun əhəmiyyətini vurğulayıb. O, bildirib ki, “Bu gün fəaliyyətə başlayan İkinci Təhsil Menecerləri Forumu ölkəmizdə çox mühüm forumlardan biridir. Bu forumun fəaliyyətə başlaması, qarşımıza qoyulan hədəflərə çatmaq üçün bir vasitədir və təşviqedici bir xarakter daşıyır”.
Yusif Alıyev forumun əsas məqsədlərini də açıqlayıb: “Əsasən, Təhsil Menecerləri Forumu çərçivəsində mövcud beynəlxalq təcrübənin yerli təcrübə ilə uyğunlaşdırılması nəzərdə tutulur. Qarşıda duran əsas hədəflərdən biri də təhsil müəssisələrində və təhsil idarəçilərinin fəaliyyət prinsiplərini müəyyən etməkdir”.
Forum çərçivəsində müzakirə edilən əsas məsələlərdən biri də gənc nəslin ekoloji tərbiyəsi və ekoloji məsuliyyət ruhunda yetişdirilməsi olub. Yusif Alıyev qeyd edib ki, “Rəqəmsallaşmanın qloballaşma şəraitindəki əhəmiyyəti ilə yanaşı, onun ekologiyaya vurduğu zərər də ciddi araşdırma tələb edir. Hazırda texnoloji avadanlıqların istehsalı və utilizasiyası ekologiyaya ciddi ziyan vurur. Bu səbəbdən gənc nəsilə bu mövzuda məlumatların çatdırılması vacibdir”.
Digər vacib müzakirə mövzusu qlobal iqlim dəyişikliyi və su ehtiyatlarının tükənməsi olub. “Təhsil idarəçiləri olaraq, bu problemlərə təhsil müəssisələrində hansı prinsiplərlə yanaşılacağını müəyyən etmək bizim əsas vəzifəmizdir. Tədris proqramlarına uyğun dəyişikliklər edilməlidir. Məsələn, hazırda dünyanın ən böyük problemi içməli su ehtiyatlarının azalmasıdır. Bu faktlar daha düzgün və real şəkildə şagirdlərə çatdırılmalıdır”. – deyə Alıyev vurğulayıb.
Yusif Alıyev, həmçinin beynəlxalq təcrübələrin öyrənilməsinin əhəmiyyətini qeyd edib: “Hollandiya və Yaponiya kimi inkişaf etmiş ölkələrin təhsil prinsiplərini Azərbaycan reallığına tətbiq etmək məsələsi forumda əsas mövzulardan biri olub. Bu mövzuların müzakirəsi cəmiyyətimiz üçün çox vacibdir”.
Sonda, Yusif Alıyev forumun gələcək perspektivlərinə ümidlə yanaşdığını bildirib: “Ümid edirəm ki, Təhsil Menecerləri Forumu uğurla başladığı kimi, eyni uğurla da davam edəcək və gələcək forumlarda qarşıda duran problemlərin həlli mümkün olacaqdır”.
Nihat Tahirov
14:32 14.12.2024
Oxunuş sayı: 7127
