Akademik məzuniyyət qaydaları yeniləndi - ÖZƏL
Təsəvvür edin ki, təhsil həyatınızın ən maraqlı dövrlərindən birindəsiniz və bir anlıq dayanmağa ehtiyacınız var. Elm və Təhsil Nazirliyi bu il tələbələr üçün akademik məzuniyyət qaydalarını yeniləyərək sizə yeni imkanlar yaradır. Bu yeniliklər tələbələrə təhsillərini müvəqqəti dayandıraraq fərqli təcrübələr əldə etmək imkanı verir.
Mövzu ilə bağlı Crossmedia.az olaraq təhsil məsələləri üzrə ekspert Rizvan Fikrətoğluya müraciət etdik:
“Elm və Təhsil Nazirliyinin Kollegiyası bu il tələbələrə akademik məzuniyyətin verilməsi qaydalarını yenilənib. Akademik məzuniyyətin verilməsi qaydası nazirliyin kollegiyasının 21 fevral 2024-cü il tarixli qərarının 5-ci bəndi ilə tənzimlənir. Akademik məzuniyyət tələbələrin təhsilini müvəqqəti dayandırması kimi başa düşülməlidir. Bu məzuniyyət tələbələrə hər biri 2 ildən çox olmamaqla müddətli həqiqi hərbi xidmətə çağırıldıqda, ailə vəziyyətinə görə, səhhətinə görə, səfərbərlik üzrə hərbi xidmətə çağırıldıqda tərxis edilənədək verilir. Bunlardan başqa, qanunvericiliklə müəyyən olunmuş müddətə sosial məzuniyyətə çıxdıqda, dövlət proqramları və təhsil sahəsində Azərbaycan Respublikası ilə xarici ölkələr arasında bağlanılmış müqavilələrə uyğun müəyyənləşdirilmiş kvota çərçivəsində vətəndaşlar xarici ölkələrə təhsil almağa getdikdə, 1 il müddətinə xaricdə öz hesabına təhsil aldıqda akademik məzuniyyət verilməlidir”.
Rizvan Fikrətoğlu bildirir ki, yeni akademik məzuniyyət qaydaları tələbələrə təhsil və şəxsi inkişaf arasında tarazlığı qoruyaraq, daha dinamik və çevik bir təhsil sistemi yaratmaq imkanı verir.
“Akademik məzuniyyətdən qayıdan şəxslər tədris prosesinə növbəti tədris semestrindən buraxılırlar. Tələbə akademik məzuniyyətdə olduğu müddətdə təhsil aldığı ali təhsil müəssisəsində öz ixtisası və təhsilalma forması üzrə kadr hazırlığı dayandırılıbsa, o, həmin müəssisədə mövcud təhsilalma formasında və ali təhsil müəssisəsi tərəfindən müəyyən olunan uyğun ixtisasda təhsilini davam etdirməlidir”.
Yeni akademik məzuniyyət qaydaları tələbələr üçün yeni imkanlar yaradır. Bu yeniliklər, tələbələrə təhsilə fasilə verərkən şəxsi və peşəkar inkişaflarını davam etdirməyə kömək edir. Elm və Təhsil Nazirliyinin bu addımı tələbələrin daha çevik və uyğunlaşa bilən olmasını təmin edir.
Samirə Şərif
05:42 05.12.2024
Oxunuş sayı: 6296
