NATO rəsmisi: Azərbaycan Alyans üçün etibarlı tərəfdaşdır
Azərbaycan NATO və Alyansın digər tərəfdaş ölkələri ilə təhlükəsizlik və müdafiə islahatları, kibertəhlükəsizlik və terrorla mübarizə daxil olmaqla bir çox sahədə sıx əməkdaşlıq edir.
Crossmedia.az xəbər verir ki, bunu NATO-nun Cənubi Qafqaz üzrə Ofisinin rəhbəri Aleksandr Vinnikov müsahibəsində bildirib.
Onun sözlərinə görə, Azərbaycan Silahlı Qüvvələrinin imkanlarının artırılması və NATO ilə qarşılıqlı uyğunluğun gücləndirilməsi Alyansın Azərbaycanla tərəfdaşlığının əsas istiqamətlərindən biridir.
A. Vinnikov qeyd edib ki, Azərbaycanın 1994-cü ildən NATO-nun “Sülh naminə tərəfdaşlıq” proqramında iştirakı çərçivəsində NATO və ayrı-ayrı müttəfiq ölkələr tərəfindən seçilmiş bölmələrin inkişafına, onların Alyans standartlarına uyğunlaşdırılmasına dəstək göstərilib. Bu proqram vasitəsilə Azərbaycan NATO standartlarına uyğun bölmələr formalaşdırır, NATO rəhbərliyi altında sülhməramlı əməliyyatlarda iştirak üçün qüvvələr hazırlayır və gələcək mümkün missiyalar üçün digər imkanlarını inkişaf etdirir.
NATO rəsmisi əlavə edib ki, Azərbaycan Kosovoda və Əfqanıstanda NATO rəhbərliyi altında həyata keçirilən missiya və əməliyyatlara mühüm töhfə verib. Eyni zamanda ölkə “Tərəfdaşlıq üzrə qərargah vəzifələri” təşəbbüsü vasitəsilə NATO-nun hərbi strukturlarında nəzərəçarpacaq iştirak nümayiş etdirir.
Aleksandr Vinnikov vurğulayıb ki, Azərbaycan minatəmizləmə sahəsində, eləcə də kritik enerji infrastrukturunun, o cümlədən terror təhdidlərindən qorunması istiqamətində əməkdaşlığa uzunmüddətli maraq göstərir.
15:15 09.01.2026
Oxunuş sayı: 1420
