Kolumbiya Prezidenti: Tramp Hitlərdən də betərdir
Kolumbiya Prezidenti Qustavo Petro ABŞ-nin son hərbi addımlarını kəskin tənqid edib. O, bildirib ki, ABŞ tarixdə ilk dəfə Cənubi Amerikanın paytaxt şəhərini bombalayan ölkə olub.
Crossmedia.az xəbər verir ki, bu barədə xarici KİV məlumat yayıb.
Prezidentin sözlərinə görə, bu, bəşər tarixində görünməmiş bir hadisədir:
“ABŞ dünyada Cənubi Amerikanın paytaxtını bombalayan ilk ölkədir. Hətta Netanyahu, Hitler, Franko və ya Salazar belə buna əl atmayıb. Bu, çox dəhşətli bir ‘şöhrət nişanı’dır və cənubi amerikalılar bunu nəsillər boyu unutmayacaqlar”.
Qustavo Petro qeyd edib ki, Latın Amerikası yalnız Şimala deyil, dünyanın bütün istiqamətlərinə baxmağı bacaran, əməkdaşlıq və birliyə açıq bir regiondur. Lakin onun fikrincə, ilk dəfə bombalanan Cənubi Amerika paytaxtı, Hitlerin Gernikanı bombalaması kimi, tarixdən silinməyəcək.
“Dostlar bir-birini bombalamaz”, – deyə Kolumbiya Prezidenti vurğulayıb.
Fatimə Məmmədova
22:02 05.01.2026
Oxunuş sayı: 2628
