Məşhur boksçunun yaralandığı qəzanı törədən sürücüyə ittiham irəli sürüldü
Nigeriyada məşhur boksçu Entoni Coşuanın yaralanması və onun iki yaxın həmkarının həyatını itirməsi ilə nəticələnən ağır yol qəzası ilə bağlı avtomobili idarə edən şəxsə rəsmi ittihamlar irəli sürülüb.
Crossmedia.az xəbər verir ki, bu barədə “Reuters" məlumat yayıb.
Belə ki, 46 yaşlı Adeniyi Mobolaji Kayode təhlükəli sürücülük və ölümə səbəb olma da daxil olmaqla dörd maddə üzrə məsuliyyətə cəlb olunub.
İlkin araşdırmalar göstərir ki, yüksək sürətlə hərəkət edən avtomobil ötmə manevri zamanı nəzarətdən çıxaraq yol kənarında dayanmış yük maşınına çırpılıb.
Qəza zamanı “Lexus” markalı avtomobildə olan britaniyalı dünya çempionu Entoni Coşua yüngül xəsarətlərlə xilas olub. Lakin onun komanda üzvləri Sina Ghami və Latif Ayodele hadisə yerində həyatlarını itiriblər. Hazırda səhhəti stabil qiymətləndirilən Coşuanın işi üzrə məhkəmə baxışı yanvarın 20-dək təxirə salınıb.
Fatimə Məmmədova
15:15 03.01.2026
Oxunuş sayı: 3089
