AÇIQLANDI: Azərbaycanla-Ermənistan sərhəddinin bu hissəsində demarkasiya başlayır
Ermənistan parlamentinin spikeri Alen Simonyan bildirib ki, yaxın günlərdə Ermənistan-Azərbaycan sərhədinin növbəti hissəsində demarkasiya prosesi həyata keçiriləcək. Bu açıqlama iki ölkə arasında davam edən danışıqlar fonunda yeni mərhələyə keçidin xəbərçisi kimi qiymətləndirilir. Bu mərhələnin regiondakı siyasi dinamika və ikitərəfli münasibətlərə necə təsir göstərəcəyi, həmçinin sərhədin demarkasiya olunacağı ərazilərdə təhlükəsizlik durumunun nə şəkildə formalaşacağı əsas sual olaraq ön plana çıxır.
Mövzu ilə bağlı politoloq Yusif Bağırzadə Crossmedia.az-a açıqlama verib. O, bildirib ki, Ermənistan parlamentinin spikeri Alen Simonyanın sərhəddin növbəti hissəsinin demarkasiyası ilə bağlı dedikləri əslində gözlənilən açıqlama idi: "Çünki, demorkasiya və delimitasiya komissiyası artıq uzun müddətdir ki, bu istiqamərdə bəyanatlarla çıxış edir. Şübhəsiz ki, delimitasiya və demarkasiya prossesi olduqca mürəkkəb və uzun bir prossesdir. Amma prossesin davamlı olması Cənubi Qafqazdakı geopolitik vəziyyətə də əhəmiyyətli şəkildə təsir göstərir.
Sərhədin demarkasiyası, hər iki ölkənin qarşılıqlı etimadını və diplomatik münasibətlərini möhkəmləndirməyə xidmət edir. Demarkasiya, münaqişə sonrası, hər iki tərəfin ərazi bütövlüyü məsələsindəki mövqelərinin dəqiqləşdirilməsini və sərhəd bölgələrində daha sabit bir mühitin yaranmasını təmin edir. Bu, həmçinin Azərbaycan və Ermənistan arasında hər hansı baş verə biləcək gərginliklərin aradan qaldırılması və iki ölkənin iqtisadi əlaqələrinin inkişafına şərait yaratmaq baxımından vacibdir’’.
Politoloq qeyd edib ki, sərhədin dəqiq müəyyənləşdirilməsi, iki ölkənin daha səmərəli nəqliyyat əlaqələrini bərpa etməsinə də zəmin yaradacaq: "’Bunların nəticəsində isə, uzunmüddətli iqtisadi faydalar baş verəcəkdir. Demarkasiya prosesinin tez başa çatması və müsbət nəticələr verməsi isə tərəflərin diplomatik niyyətlərinə bağlıdır. Azərbaycan üçün prioritet və sərhədin müəyyən edilməsi ilə bağlı gözləntiləri, əvvəlki münaqişələrin izlərinin aradan qaldırılması və hələ də Ermənistanın işğalı altında olan kəndlərimizin tez bir zamanda boşaldılması ilə bağlıdır.
Şübhəsiz ki, sərhədlərin delimitasiya və demarkasiyası təhlükəsizlik baxımından da diqqət tələb edir. Sərhədin demarkasiya olunması, yalnız xətti müəyyən etmək deyil, həm də sərhəd bölgələrinin təhlükəsizliyinin təmin edilməsi və gərginliklərin qarşısının alınması üçün ciddi təhlükəsizlik tədbirlərinin görülməsini tələb edir. Son olaraq qeyd edim ki, Azərbaycan-Ermənistan sərhədinin demarkasiyası, münaqişə sonrası sabitliyin təmin edilməsi və regionda uzunmüddətli sülhün qurulması üçün vacib bir addımdır’’.
Sevinc Yarməmmədova
16:25 11.12.2025
Oxunuş sayı: 1248
