Azərbaycan, İran, Ermənistan üçtərəfli əlaqələrinin genişlənməsinə şərait yaranıb - Deputat
Azərbaycanın qələbəsi həm iqtisadi, həm də digər sahələr üzrə ikitərəfli əlaqələrdə yeni imkanlar yaradıb. Bunu Naxçıvanda səfərdə olan İranın Azərbaycandakı səfiri Müctəba Dəmirçili deyib.
Mövzu ilə bağlı Crossmedia.az-a açıqlamasında Milli Məclisin deputatı Aydın Mirzəzadə bildirib ki, İranın Azərbaycan mövqeyini müdafiə etməsi iki ölkə arasında münasibətlərin daha da genişlənməsi və dərinləşməsi üçün mühüm zəmin yaradır: “İran rəsmilərinin Azərbaycanın qələbəsini yüksək qiymətləndirməsi oluqca vacib bir məqamdır. Azərbaycan və İran minillərin qonşularıdır və aralarında ümumi tarixi, mədəniyyəti var. Azərbaycan həmişə cənub qonşusu ilə yaxşı münasibətlər qurmaqda maraqlı olub. Tarixi zəfərimiz Azərbaycan dövlətçiliyinin inkişafında böyük perspektivlər açır.
Azad olunan torpaqlarımızda quruculuq işləri başlayır, məcburi köçkünlər torpaqlarına qayıdır. Azərbaycan iqtisadiyyatı yeni potensial əldə edir”.
Parlamentari İranın Qarabağın quruculuq-bərpa işlərinə verə biləcəyi töhfədən də danışıb: “Bizim gələcəyə dair planlarımız artıq birbaşa quruculuqla bağlıdır və İran da bu proseslərdə yaxından iştirak edə bilər. Birincisi, ticari və iqtisadi əlaqələri həm həcmi, həm çeşitləri genişlənəcək. Digər tərəfdən, İran şirkətləri Azərbaycanın işğaldan azad olunan ərazilərində quruculuq-bərpa işlərində iştirak edə bilərlər. Birgə layihələrimiz həyata keçiriləcək. Sərhədyanı ticarət inkişaf edəcək. Ermənistan Azərbaycan torpaqlarının bir hissəsini işğal altında saxlayanda Azərbaycan, İran, Ermənistan üçtərəfli əməkdaşlığı qeyri-mümkün idi. Büyük zəfərimiz isə artıq bu sahədə perspektivlər açır. Azərbaycan tərəfi Ermənistana gedən taxılla dolu yük qatarlarını öz ərazisindən buraxdı. Bu, Ermənistanda böyük hadisə kimi qiymətləndirildi. Artıq Ermənistan Azərbaycanın logistikasından istifadə edərək digər yüklərin də Ermənistana çatdırılmasında böyük imkanlar əldə edir. Bu isə gələcəkdə üçtərəfli əlaqələrin genişlənməsinə şərait yaradır”.
A.Mirzəzadə Azərbaycanın Qarabağ zəfərinin Cənubi Qafqaza verdiyi imkanları belə şərh edib: “Azərbaycan zəfəri həmçinin Cənubi Qafqazda stabillik, əməkdaşlıq, birgə fəaliyyət imkanları açır. Bu səbəbdən artıq dünya Azərbaycan zəfərini daha yüksək qiymətləndirməyə başlayır. İranın isə bu məsələdə Azərbaycan mövqəyini müdafiə etməsi Azərbaycan-İran münasibətlərini daha da genişləndirməyə və dərinləşdirməyə imkan verir”.
Günel Verdiyeva
16:19 05.11.2025
Oxunuş sayı: 1385
