Ersin Tatar dövründə Şimali Kipr Türk dünyasına inteqrasiyanı sürətləndirib - Ekspert
Şimali Kipr Türk Respublikasının Prezidenti Ersin Tatar prezident seçkiləri öncəsi çıxışında ölkəsinin “hücum diplomatiyası”na keçdiyini və Türk Dövlətləri Təşkilatına üzv ölkələrlə “qardaş bazarlar şəbəkəsi” qurulacağını bildirib. O vurğulayıb ki, bu addım Türkiyə və digər türk dövlətləri ilə kommunikasiya, təhsil, turizm və istehsal sahələrində əməkdaşlığı gücləndirməyə yönəlib. Ersin Tatar hazırda keçiriləcək seçkilərdə yenidən prezidentliyə namizəddir.
“Şimali Kipr Türk Respublikası Ersin Tatarın prezidentliyi dövründə TDT ilə əlaqələrdə milli xəttə xüsusi önəm verən bir ölkəyə çevrildi. Bu prosesdə TDT-nin artan nüfuzunu da nəzərə almaq lazımdır. Ersin Tatardan əvvəlki dövrlərdə daha çox Kiprin Avropa İttifaqına meyilliliyi hiss olunurdu. Lakin Annan planına uyğun olaraq Cənubi Kipr Respublikasının bu birliyə “yox” deməsindən sonra Şimali Kiprdə də anlayış yarandı ki, onların izləməli olduqları istiqamət Türkiyənin uzun illərdir dəstəklədiyi milli xəttdir və bu xəttə digər türk respublikalarından da dəstək alınmalıdır”.
Bu barədə Crossmedia.az - a açıqlama verən Türk dünyası üzrə mütəxəssis İlqar İlkin qeyd edib ki, Ersin Tatarın prezidentliyi dövründə Şimali Kipr Türk Respublikasına Türk Dövlətləri Təşkilatında müşahidəçi statusu verilməsi bu inteqrasiyanın sürətlə artdığını göstərdi:
“Ötən il Cənubi Kipr Respublikasının Türküstan ölkələrində səfirlik açmaq məsələsini gündəmə gətirməsi zamanı da Şimali Kipr tərəfi təmkinli və müdrik davranış nümayiş etdirdi. Burada Ersin Tatarın siyasi uzaqgörənliyi və türk yönümlü siyasəti mühüm rol oynadı. Bu gün Türk Dövlətləri Təşkilatının Şimali Kipr Türk Respublikasının beynəlxalq tanınması istiqamətində daha ciddi addımlar ata biləcəyi gözlənilir. Mən hesab edirəm ki, bu addımlar atılmalıdır və ola bilsin ki, yaxın 1–2 il ərzində biz bu prosesin şahidi olacağıq. Şimali Kipr Türk Respublikası hazırda daha çox universitetləri və böyük turizm potensialı ilə tanınır. Düşünürəm ki, digər türk dövlətlərində də bu ölkənin təcrübəsinə əsaslanaraq oxşar universitetlərin yaradılması üçün təbliğat aparılmalıdır. Eyni zamanda turizm sahəsində də qarşılıqlı fəaliyyət genişləndirilməlidir. Bu istiqamətdə atılan addımlar türk respublikalarının Şimali Kiprin iqtisadi inkişafına və sosial yüksəlişinə mühüm töhfə verəcək”.
Ekspert bildirib ki, Azərbaycanla Şimali Kipr Türk Respublikası arasındakı münasibətlərə gəldikdə isə məlumdur ki, iki ölkə rəhbərləri arasında səmimi və isti əlaqələr mövcuddur: “Düşünürəm ki, Türk Dövlətləri Təşkilatında Şimali Kipr Türk Respublikasının daha fəal təmsil olunmasında və onun aktivləşməsində Azərbaycan əsas təşəbbüskar və dəstəkçi ölkələrdən biridir. Bundan sonrakı mərhələdə Azərbaycanla Şimali Kipr arasında iqtisadi əlaqələrin daha da genişləndirilməsi vacibdir. Artıq bu il Şimali Kipr Türk Respublikasının universitetlərindən biri Azərbaycanda öz filialını açıb. Hesab edirəm ki, bu kimi layihələrin sayı gələcəkdə artacaq və Azərbaycanla yanaşı Orta Asiyadakı türk respublikaları da təhsil və turizm sahəsində daha sıx əməkdaşlıq qurmaqla bu potensialdan səmərəli şəkildə yararlana biləcəklər”.
Türkanə Məşədiyeva
19:10 18.10.2025
Oxunuş sayı: 26759
