Azərbaycan-Rusiya münasibətlərində gərginlik dövrü sona çatdı - Deputat
Bu gün Azərbaycan Prezidenti İlham Əliyev ilə Rusiya Prezidenti Vladimir Putin arasında baş tutan təkbətək görüş, regional və beynəlxalq siyasətdə diqqət çəkən hadisə kimi yadda qaldı. Görüş zamanı tərəflər arasında səmimi dialoq mühiti yaradılmış, mühüm nəticələr əldə olunmuşdur. Xüsusilə, Rusiya tərəfinin üzr ifadə etməsi, iki dövlət arasındakı münasibətlərin normallaşması üçün yeni üfüqlər açır. Bu addım, uzun müddət gərginlik və anlaşılmazlıqla yadda qalan münasibətləri bərpa etmək üçün potensial imkanlar yaradır və gələcək əməkdaşlığın əsasını qoymaq üçün əhəmiyyətli bir mərhələ hesab oluna bilər.
Məsələ ilə bağlı Crossmedia.az saytına açıqlama verən Milli Məclisin deputatı, MCP sədri Razi Nurullayev bildirib ki, artıq münasibətlərin normallaşdığını deyə bilərik: “Elə bu gün mediaya verdiyim müsahibələrdə və bundan əvvəlki açıqlamalarımda da qeyd etmişdim ki, Rusiya tərəfi üzr istəyəcək və bildirəcək ki, hələlik istintaq başa çatmayıb, amma bununla bağlı müəyyən məlumatlar var. Məlumatlar veriləcək və münasibətlər normallaşacaq. Bu gün isə çox sevindim. Rusiya daha müdrik davrandı, üzr istədi və kompensasiya verəcəyini bildirdi. İki dövlət başçısı arasında səmimi münasibət yarandı, səmimi görüş keçirildi. Bu məni sevindirir, çünki Rusiya böyük ölkədir. Rusiya ilə münasibətlərimizin yaxşı olması vacibdir — həm iqtisadi, həm siyasi cəhətdən, həm də orada yaşayan 2 milyona yaxın azərbaycanlımız üçün. Heç bir gərginlik, münaqişə heç bir ölkəyə xeyir gətirmir".
Deputat vurğulayıb ki, artıq münasibətlərin gərginlik mərhələsini arxada qoymaq mümkündür: “Təbii ki, artıq münasibətlərin gərginlik mərhələsini arxada qoyduğumuzu deyə bilərik və düşünürəm ki, bundan sonrakı proseslərdə günü-gündən olan gərginlik aradan qalxacaq. Rusiyada azərbaycanlılara qarşı təzyiq metodları dayandırılacaq, siyasi təzyiq metodlarından istifadə olunmayacaq. Bu, sevindirici haldır. Ümid edirəm ki, artıq problemlər arxada qaldı və günü-gündən münasibətlərin yaxşılaşmasının şahidi olacağıq. Amma ən önəmlisi odur ki, Azərbaycan müstəqil siyasət yeritdi, tələb qoydu, beynəlxalq hüququn həyata keçirilməsini istədi və hər şey Azərbaycanın istədiyi kimi oldu. Buna görə də cənab Prezidentə, Azərbaycan xalqına və Azərbaycan dövlətinin gücünə təşəkkür etmək olar".
Mehriban Yariyeva
19:23 09.10.2025
Oxunuş sayı: 2098
