Zəngəzur dəhlizinin açılmasını sadəcə iqtisadi dəhliz kimi görməməliyik- Deputat
Zəngəzur dəhlizinin açılması təkcə Azərbaycan üçün deyil, bütövlükdə Türk dünyası üçün strateji və tarixi əhəmiyyət daşıyır. Bu dəhliz türk dövlətləri arasında birbaşa quru bağlantısı yaradaraq, iqtisadi, logistika və enerji əməkdaşlığını gücləndirəcək, regiondakı ticarət axınını sürətləndirəcək. Həmçinin Zəngəzur dəhlizi Türk Dövlətləri Təşkilatının (TDT) inteqrasiya prosesində mühüm mərhələ olacaq, təşkilat üzvlərinin siyasi, iqtisadi və mədəni əlaqələrini yeni səviyyəyə qaldıracaq. Bu, həm də Qafqazdan Mərkəzi Asiyaya uzanan vahid türk geosiyasi məkanının formalaşmasına real zəmin yaradacaq.
Mövzu ilə bağlı Milli Məclisin deputatı Jalə Əliyeva Crossmedia.az-a açıqlama verib:
“TDT liderləri Qəbələdə toplaşıb və bu zirvə toplantısı da Azərbaycanın təşəbbüsü, liderliyi ilə keçirilir. Əlbəttə ki, burada çox əhəmiyyətli məsələlər müzakirə edilir. Bu gün türk dövlətlərinin birliyi ümumilikdə dünya üçün böyük əhəmiyyət kəsb edir. Türk dövlətlərinin birliyi böyük bir arealı əhatə edir və bu arealda çoxsaylı türkdilli xalq var. Onların gələcəyi, sabitliyi, rifahının yüksəlməsi, inkişafı çox əhəmiyyətli məqamdır. Zəngəzur dəhlizinin açılması da təşkilatın üzvü olan ölkə xalqlarının inkişafına və daha məhsuldar şəkildə inteqrasiya etməsinə zəmin yarada biləcək əhəmiyyətli bir amildir. Biz bu dəhlizi sadəcə iqtisadi dəhliz kimi görməməliyik. Bu dəhliz birinci növbədə sülh, barış, inkişaf və mədəniyyətlərin qovuşduğu dəhlizdir. Bu gün mədəniyyətlərarası dialoqa da ev sahibliyi etməkdə olan Azərbaycan illərdən bəri bu dəhlizin açılmağı ilə çoxsayda xalqların bir simvol altında birləşməsinə imkan yaradacaq. Buna görə də düşünürəm ki, bu dəhlizin açılması logistik, coğrafi, siyasət, ticarət baxımdan və mənəvi körpülərin daha da inkişaf etdirilməsi baxımından daha da inkişaf etdirilməkdədir”.
Ayhan
21:41 08.10.2025
Oxunuş sayı: 1473
