Azərbaycan Qırğızıstan əlaqələri özünün inkişaf dövrünü yaşayır - Deputat
Azərbaycan və Qırğızıstan arasında dərin köklərə dayanan tarixi, mədəni və dini bağlar, həmçinin ortaq dəyərlərə əsaslanan münasibətlər bu gün strateji tərəfdaşlıq səviyyəsində inkişaf edərək regionda sabitlik və əməkdaşlıq üçün mühüm zəmin yaradır. 1993-cü ildə qurulan diplomatik əlaqələr, illər ərzində hökumətlər və parlamentlər səviyyəsində sıx əməkdaşlıq, yüzdən çox imzalanmış sənəd və xüsusilə “Strateji Tərəfdaşlıq haqqında Bəyannamə” ilə hüquqi cəhətdən möhkəmlənmişdir. Azərbaycanın ərazi bütövlüyünə Qırğızıstanın sarsılmaz dəstəyi, işğaldan azad olunmuş ərazilərin bərpasında göstərdiyi töhfələr, iqtisadi layihələrdə birgə fəaliyyət və mədəniyyətlərarası qardaşlaşma bu əlaqələrin çoxşaxəliliyini və dərinliyini nümayiş etdirir. Azərbaycan-Qırğızıstan münasibətləri, qarşılıqlı hörmət və ortaq maraqlar əsasında inkişaf edərək, hər iki ölkənin regionda və beynəlxalq aləmdə mövqeyini gücləndirən mühüm bir tərəfdaşlıq modelinə çevrilmişdir.
Mövzu ilə bağlı Milli Məclisin deputatı Azər Badamov Crossmedia.az-a açıqlama verib:
"Azərbaycan və qırğız xalqları eyni kökə, mədəniyyətə əsaslanmış ümumi tarix və eyni din və dil birləşdirir. Ölkələrimiz arasında 1993-cü ildə formalaşmış diplomatik əlaqələr hökumətlər və parlamentlər arası əlaqələrlə inkişaf etməklə strateji tərəfdaşlıq səviyyəsinə yüksəlmişdir. Azərbaycanla Qırgızıstan arasında imzalanmış yüzdən çox sənəd əməkdaşlığımızın dərinləşdirlməsi üçün geniş hüquqi baza formalaşdırmışdır. Ən mühüm sənədlərdən biri isə Qırğızıstan Prezidentinin Azərbaycana rəsmi səfəri zamanı imzalanmış “Strateji Tərəfdaşlıq haqqında Bəyannamə”dir. Bu Bəyannamə iki ölkə arasında strateji tərəfdaşlıq münasibətlərini hüquqi əsaslarla möhkəmləndirib, gələcəkdə daha sıx əməkdaşlıq üçün zəmin hazırlayıb. Ölkələrmiz beynəlxalq təşkilatlarda bir-birinin mövqeyini dəstəkləməsi sözümüzün gücünü artırır. Torpaqlarımız işğal altında olduğu dövürdə Qırğızıstan ərazi bütövlüyümüzü həmişə dəstəkləmişdir. Ərazilərimiz işğaldan azad olunanda və Qarabağda separatçılığın yuvasını məhv edəndə qırğız xalqı xalqımızın sevincinə şərik olmuşdur. O cümlədən Qırğızıstan Azərbaycanın işğaldan azad olunmuş ərazilərin yenidən qurlma və bərpası işlərinə dəstək verərək Ağdamın Xıdırlı kəndində 528 yerlik orta məktəb binasının tikintisini hədiyyə edir. Bakı və Bişkek, Quba və Kant şəhərlərin qardaşlaşması mədəniyyətlərarası əlaqələrin dərinləşməsinə töhfə vermişdir. Ölkələrimiz iqtisadi əlaqələrini inkişaf etdirmək istiqamətində də önəmli addımlar atır. Hazırda Azərbaycanda 70-dən çox Qırğızıstan şirkəti fəaliyyət göstərir. 2022-ci ildə iqtisadi əməkdaşlığı genişləndirmək üçün Azərbaycan-Qırğız İnkişaf Fondu təsis edilib. İki ölkə arasındakı Şərq-Qərb Beynəlxalq Nəqliyyat Dəhlizi və Transxəzər Beynəlxalq Nəqliyyat Marşrutu ilə yükdaşımalar əməkdaşlığın iqtisadi sahədə genişləndiyini göstərir. Ümumiləşdirib deyə bilərik ki, Azərbaycan-Qırğızıstan əlaqələri strateji tərəfddaşlıq səviyyəsinə yüksələrək özünün inklişaf dövrünü yaşayayır. Bu da ölkələrimizin inkişafına, güclənməsinə və hərtərəfli münasibətlərin möhkəmlənməsinə impuls verir".
Ayhan
20:02 01.09.2025
Oxunuş sayı: 3855
