Gündəm,Cənubi Qafqaz
Rusiya Ermənistanda aktivləşir - Çevriliş ola bilər?
Ermənistanda peşəkarlardan ibarət yeni siyasi qüvvə yaradılır və ona əvvəllər həbs olunmuş rusiyalı erməni biznesmen Samvel Karapetyan rəhbərlik edəcək. Bu barədə onun qardaşı oğlu Narek Karapetyan məlumat verib. Yeni komanda xarici siyasət, iqtisadi və sosial sahələrdə Karapetyanın rəhbərliyi ilə fəaliyyət göstərəcək. Xatırladaq ki, Samvel Karapetyan iyunun 18-də hakimiyyəti zorla ələ keçirməyə çağırışda ittiham olunaraq iki aylıq həbs edilib.
Samvel Karapetyanın siyasi səhnəyə dönüşü Ermənistanda ciddi müzakirələr doğura bilər. Onun keçmişi və həbsi həm daxili narazılıqları gücləndirə, həm də müxalifət üçün toparlanma imkanı yarada bilər. Lakin real güc qazanması həm beynəlxalq reaksiya, həm də daxili legitimlikdən asılı olacaq.
Mövzu ilə bağlı politoloq Tofiq Abbasov Crossmedia.az-a açıqlama verib. T.Abbasov Karapetyanın Rusiyada fəaliyyət göstərən bir çox erməni iş adamlarının tipik nümayəndəsi olduğunu bildirib: “Samvel Karapetyan sözün əsl mənasında siyasi adam deyil, yəni onu zorla siyasiləşdirirlər. Və bunu edən də xarici qüvvələrdir. Açıq desək, burada Rusiyanın maraqları var. Çünki o, özünü biznesmen kimi qələmə verir. Əslində, o qədər də peşəkar biznesmen deyil. Yəni Rusiyada fəaliyyət göstərən bir çox erməni iş adamlarının tipik nümayəndəsidir. O, çirkli pulların yuyulmasında, bank proseslərindəki o maxinasiyalarda, daşınma və elektrik enerjisinin alış-verişi ilə məşğul olan bir məmurdu – sadəcə olaraq, onu zorla siyasiləşdirirlər.
Mən elə başa düşürəm ki, burada yeni partiyanın yaradılması nə rol oynayacaq, nə də əhəmiyyət daşıyacaq. Çünki faktiki olaraq bu adamın sosial bazası yoxdur. Əgər bu sosial baza onun kapitalı üzərində qurulursa, bu nə dərəcədə özünü doğrulda bilər? Siyasi baxışlar olmalıdır. Əgər partiya yaradırsa, onun fəaliyyət istiqamətləri, nizamnaməsi, strukturu olmalıdır. Digər tərəfdən, bu adamın dövlət idarəçiliyində təcrübəsi olmalıdır.
Belə şəxsləri zorla yetişdirib ortaya atmaqla “bəli, bizim namizədimiz var”, “bəli, bu adamlar Rusiyada artıq kapital əldə ediblər” deməklə məsələ həll olunmur. Rusiya-Ermənilər İttifaqı var, orada Ara Abrahamyan rəhbərlik edir. O da savadsız şəxslərdəndir – baxmayaraq ki, küllü miqdarda pul əldə edib. Yəni bunlar vaxtından tez ortaya atılan, siyasi savadı, siyasi duyumu, bacarığı və kreativliyi olmayan adamlardır. Demək olmaz ki, bunlar gəlib nəsə edə biləcəklər.
Məsələn, indiki halda açıq-aşkar hakimiyyətə göz dikmək, Nikol Paşinyana alternativ yaratmaq – bax, bütün bu məqamlar açıq şəkildə özünü göstərir. Əgər həqiqətən də burada söhbət hansısa ölkənin maraqlarının təmin olunmasından gedirsə, bu o demək deyil ki, ortaya atılan hər adamın şansı var, digər tərəfdən, o, açıq-aşkar bir yönlü və cəlbedici siyasi platforma da ortaya qoya bilsin”.
Politoloq öz açıqlamasında söyləyib ki, Samvel Karapetyan yaradılmış süni personadır: “Bəli, o,çoxvektorlu siyasət apardığını deyir, amma bu, daha çox ritorikadır. Məsələn, Azərbaycan kommunikasiyaların açılmasına “hə” deyir, Paşinyan isə bildirir ki, Azərbaycanın seçdiyi marşrutları anlayırlar, lakin öz yanaşmaları var. Bu isə sülh gündəliyinin dördüncü yolu kimi təqdim olunur.
Abu Dabi görüşündən sonra Ermənistan tərəfi müəyyən qədər ruhlanıb. Görürlər ki, Azərbaycanla ikitərəfli danışıqlarda bir çox məsələlər masa arxasında həll oluna bilər.
Yenidən vurğulayıram, bu, yeni ortaya atılmış Samvel Karapetyanın nə siyasi təcrübəsi var, nə də real hazırlığı. O, sözün əsl mənasında “kreatura”dır – yəni kiminsə düzəldib ortaya atdığı, süni şəkildə yaradılmış bir siyasi personadır. Hələlik siyasi aləm üçün hazır deyil. Ola bilsin, illər sonra hansısa bacarıq əldə etsin, amma indiki vəziyyətdə bu mümkün deyil.
Düşünürəm ki, bu adam Ermənistanın siyasi səhnəsinə heç bir yenilik gətirməyəcək. Paşinyanın isə hazırda əsas məqsədi Kilsə ilə olan ziddiyyətləri aradan qaldırmaqdır. Çünki Kilsə Ermənistan üçün dərin dövlət funksiyasını daşıyır və Paşinyan da bu strukturun təsirini sındırmaq istəyir. Əgər bunu bacarsa, düşünürəm ki, Paşinyan həm Rusiya ilə münasibətlərdə balansı saxlayacaq, həm də 2026-cı il seçkilərinə uğurla gedəcək”.
Nicat Rüstəmzadə
12:57 30.07.2025
Oxunuş sayı: 8119
