Ermənistan üçün son şans: ""Ev tapşırığı"nı yerinə yetirməsə..."
Azərbaycanın xarici işlər naziri Ceyhun Bayramov ilə Türkiyənin xarici işlər naziri Hakan Fidan arasında telefon danışığı olub.
Telefon danışığı zamanı Azərbaycan-Türkiyə müttəfiqlik münasibətlərindən irəli gələn məsələlər, regional və beynəlxalq təşkilatlar çərçivəsində əməkdaşlıq, Azərbaycan-Ermənistan normallaşma prosesi müzakirə olunub. Bununla yanaşı, regional və beynəlxalq müstəvidə müşahidə olunan təhlükəsizlik problemləri nəzərdən keçirilib.
Azərbaycan-Türkiyə qardaşlığına əsaslanan müttəfiqlik münasibətlərinin bütün səviyyə və platformalarda uğurla davam etdirildiyi məmnunluqla qeyd edilib.
C.Bayramov həmkarını Azərbaycan-Ermənistan normallaşma prosesi və onun müxtəlif aspektləri, sülh sazişi üzrə cari vəziyyət və perspektivlər, habelə mövcud maneələr və onların həlli istiqamətində səylər barədə ətraflı məlumatlandırıb.
Telefon danışığında, həmçinin qarşılıqlı maraq doğuran digər məsələlər ətrafında fikir mübadiləsi aparılıb.
Məlum olduğu kimi, Bakı və Ankara xarici siyasətin bir çox istiqamətləri üzrə, o cümlədən Cənubi Qafqazda daim koordinasiyalı davranırlar. Bu koordinasiyalı siyasət isə regionda sülh və sabitliyin, əməkdaşlıq mühitinim təmin olunmasına yönəlib.
İki qardaş ölkənin birgə səyləri barədə
Milli Məclisin deputatı Könül Nurullayeva Crossmedia.az-a açıqlama verib:
“Azərbaycan və Türkiyə xarici işlər nazirləri arasında baş tutan telefon danışığı zamanı sülh prosesi diqqət mərkəzində olub. Bu da təsadüfi deyil. Bakı və Ankara tez bir zamanda regionda dayanıqlı sülhün təmin olunmasında maraqlıdır. Doğrudur, Əbu-Dabi görüşündən sonra ümidlər artıb, Ermənistanın baş naziri Nikol Paşinyanın da sülh bəyanatları intensivləşib. Eyni zamanda Paşinyan Azərbaycanın ərazi bütövlüyünü tanımaqla doğru qərar verdiyini də etiraf edib. Yəni, Ermənistan Azərbaycanın sülh konsepsiyasını qəbul edir. Lakin rəsmi Bakının 2 əsas şərti yerinə yetirilməlidir- Ermənistan Konstitusiyası dəyişdirilməli, ATƏT-in Minsk Qrupu ləğv edilməlidir. Prezident İlham Əliyev 3-Şuşa Qlobal Forumunda da bəyan etdi ki, bu iki məsələ, - Ermənistan konstitusiyasına dəyişiklik və ATƏT-in Minsk qrupunun buraxılması, - həll edilən kimi sülh müqaviləsi imzalana bilər. Hər halda mətn paraflana bilər və Azərbaycan tərəfi artıq Əbu-Dabidə bu təkliflə çıxış edib”.
Deputat həmçinin bildirib:
“Rəsmi Bakının mövqeyi bundan ibarətdir ki, biz sülh müqaviləsinin imzalanmasına çox yaxınıq. Azərbaycan tərəfi artıq yenidən müzakirəyə ehtiyac görmür. Ermənistan da eyni mövqeni bölüşsə, heç bir maneə qalmır. Azərbaycan Prezidentinin də söylədiyi kimi, onlar öz "ev tapşırıqlarını" yerinə yetirməlidirlər. Bu baş verdiyi halda biz sülh müqaviləsini imzalaya bilərik. Ermənistanın "ev tapşırığını" vaxtında yerinə yetirməsinə mane olan səbəb qalmayıb. Çünki bu, onu son şansıdır. Yox, Ermənistan yenə də pozucu qüvvələrin təsiri altında prosesi uzatmağa cəhd etsə, o zaman ən böyük zərbə İrəvanın özünə dəyəcək”.
Ayhan
16:44 26.07.2025
Oxunuş sayı: 10406
