Azərbaycanın xarici işlər naziri Ceyhun Bayramovun
gürcüstanlı həmkarı Maka Boçorişvili ilə Tbilisidə keçirilən brifinqdə səsləndirdiyi
fikir — Azərbaycan və Ermənistan arasında sülh üçün real imkanların mövcudluğu
— regionda diplomatik proseslərin intensivləşdiyini göstərir. Nazir postmünaqişə
dövründəki proseslər barədə Gürcüstan tərəfinə ətraflı məlumat verildiyini
bildirərək, sülh perspektivlərinin ümidverici olduğunu, lakin bu istiqamətdə
konkret addımların atılmasının vacibliyini vurğulayıb. Delimitasiya üzrə əldə
olunan razılaşmalar, işğaldan azad olunmuş ərazilərdə aparılan bərpa işləri və
vasitəçilərsiz aparılan ikitərəfli danışıqlar bu prosesin real nəticələrə doğru
apara bilər.
Mövzu ilə bağlı Crossmedia.az-a açıqlama verən Milli Məclisin
deputatı Müşfiq Cəfərov bildirib ki, Azərbaycan-Ermənistan arasında mövcud sülh
prosesi özünün mürəkkəb mahiyyətinə və çətinliklərinə baxmayaraq davam edir:
“İki ölkənin perspektivdə davamlı sülhə nail olmasının
mümkünlüyü ilə bağlı nikbinlik üçün müəyyən əsaslar var. İlk növbədə, sülhə
birbaşa təhdid olan Azərbaycan ərazilərinin işğalı faktı aradan qaldırılaraq
münaqişə həll edilib. Xüsusilə, 2023-cü ilin sentyabrında Azərbaycan ordusunun
keçirdiyi uğurlu anti-terror tədbirləri nəticəsində bölgədə tamamilə yeni vəziyyət
yaranıb. Hazırda davam edən sülh prosesinə də məhz 2023-cü ilin sentyabrında
yaranmış yeni vəziyyət əhəmiyyətli dərəcədə təsir edib. Azərbaycan və Ermənistan
arasında normallaşma prosesinin vacib istiqamətlərindən biri də sərhədlərin
delimitasiyası üzrə danışıqlardır və son aylarda bu istiqamət üzrə müəyyən irəliləyişlər
əldə edilib. 2024-cü il aprelin 19-da Azərbaycan və Ermənistan arasında sərhəddə
Azərbaycan Respublikası ilə Ermənistan Respublikası arasında dövlət sərhədinin
delimitasiyası üzrə Dövlət Komissiyası və Ermənistan Respublikası ilə Azərbaycan
Respublikası arasında dövlət sərhədinin delimitasiyası və sərhəd təhlükəsizliyi
məsələləri üzrə Komissiyanın səkkizinci görüşündə Qazaxın Ermənistan tərəfindən
işğal olunan 4 kəndinin Azərbaycana qaytarılması barədə razılıq əldə edilib. Tərəflər
arasında normallaşma prosesinin digər vacib istiqamətlərindən biri olan sülh
sazişi layihəsinin mübadiləsi ilin əvvəlindən daha dinamik xarakter alıb. Bakı
və İrəvan arasında normallaşma prosesinə töhfə verən amillərdən biri də
danışıqların son aylarda vasitəçilərsiz, ikitərəfli müstəvidə aparılmasıdır.
Beləliklə, sülh prosesində yaranmış vəziyyət əsasən onu deyə bilərəm ki, iki
ölkə arasında sülhün əldə olunması üçün real imkanlar olmaqla bərabər, həm də
ciddi problemlər qalmaqdadır. Azərbaycan tələsməməklə danışıqlar prosesini irəli
aparmaqda və nəhayət, davamlı sülhün əldəolunmasında maraqlıdır. Bəli, sülh
prosesi üzrə perspektivlər ümidvericidir, lakin bu istiqamətdə konkret
addımların atılması vacibdir”.
Elmir Heydərli
