Azərbaycan-Türkmənistan iqtisadi əməkdaşlığında yeni dövr: strateji görüş və praktiki addımlar - Deputat
Azərbaycan ilə Türkmənistan arasında iqtisadi əlaqələrin inkişafı son dövrlərdə strateji əhəmiyyət kəsb edən məsələlərdən birinə çevrilib. Prezident İlham Əliyev və Türkmənistan Xalq Məsləhətinin sədri Qurbanqulu Berdiməhəmmədovun bu günkü yüksək səviyyəli görüşü də bunu bir daha sübut edir. Tərəflər iqtisadi əməkdaşlığın mövcud vəziyyətini dəyərləndirməklə yanaşı, əlaqələrin gələcək inkişafı üçün konkret və praktiki addımların atılmasına hazır olduqlarını nümayiş etdiriblər. Görüşdə səsləndirilən fikirlər iqtisadi sahədəki potensialın geniş olduğunu göstərməklə yanaşı, bəzi sahələrdə müşahidə olunan durğunluğun aradan qaldırılması üçün yeni yanaşmaların zəruriliyinə işarə edir.
Mövzu ilə bağlı Crossmedia.az-a danışan Milli Məclisin deputatı Naqif Həmzəyev isə bildirib ki, son görüş Azərbaycan-Türkmənistan iqtisadi əlaqələrinin möhkəmlənməsi üçün vacib əhəmiyyət daşıyır:
“Bu günkü görüşün kontekstində Azərbaycan-Türkmənistan iqtisadi əlaqələrinin vəziyyəti daha aydın görünür. Prezident İlham Əliyevin və Türkmənistan Xalq Məsləhətinin sədri Qurbanqulu Berdiməhəmmədovun görüşü iki ölkə arasında iqtisadi əməkdaşlığın gücləndirilməsinə yönəlik yeni addımların atılacağını göstərir.”
Deputat vurğulayıb ki, iqtisadi tərəfdaşlığın keyfiyyət və kəmiyyət göstəriciləri yüksəlməkdədir:
“2024-cü ildə ticarət dövriyyəsi 400 milyon dollara yaxın olub. Lakin 2025-ci ilin ilk yarısında müəyyən azalma müşahidə edilir ki, bu da bəzi sahələrdə yeni yanaşmaların tətbiqini zəruri edir.”
Naqif Həmzəyev prioritet istiqamətləri aşağıdakı kimi qeyd edib:
"Mövcud qaz mübadilə müqaviləsinin genişləndirilməsi və yeni enerji layihələrinin həyata keçirilməsi;
İki ölkə arasında birbaşa nəqliyyat əlaqələrinin gücləndirilməsi;
Energetika və nəqliyyatdan əlavə kənd təsərrüfatı, sənaye və turizm sahələrində yeni layihələrin reallaşdırılması;
Hüquqi bazanın təkmilləşdirilməsi və investisiyaların cəlb edilməsi üçün yeni mexanizmlərin yaradılması;
Özəl sektorun iştirakının artırılması məqsədilə müntəzəm biznes forumlarının təşkili.
Qurbanqulu Berdiməhəmmədov isə görüşdə qeyd edib ki, “bu səfər Türkmənistan ilə Azərbaycanın bundan sonra da yaxınlaşması və əməkdaşlığın uzunmüddətli strategiyasının reallaşdırılması kontekstində razılaşdırılmış yanaşmaların hazırlanmasında mühüm amilə çevriləcək”.
Bugünkü görüş göstərir ki, hər iki ölkə iqtisadi əlaqələrin inkişafına ciddi yanaşır və “qardaşlıq, mehriban qonşuluq və əməkdaşlıq” prinsipləri əsasında konkret addımlar atmağa hazırdır. Prezident İlham Əliyevin “gələcək əməkdaşlıqla bağlı bu gün fikir mübadiləsi aparacağıq” sözləri isə görüşdə praktiki məsələlərin müzakirə olunacağına işarədir.
Mehriban Yariyeva
19:56 16.07.2025
Oxunuş sayı: 2036
