Kipr Türk Cümhuriyyəti İslam Əməkdaşlıq Təşkilatına üzv qəbul edilsin - təklif
Quzey Kıbrıs Türk Cümhuriyyəti Prezidentinin Beynəlxalq Münasibətlər və Diplomatiya üzrə xüsusi müşaviri Prof. Dr. Hüseyin Işıksal Bakıda keçirilən “İslamofobiya Mərkəzində: Qərəzləri Göstərmək, Mənfi Qəlibləri Sındırmaq” adlı beynəlxalq konfranda çıxış edib.
Crossmedia.az xəbər verir ki, konfrans Bakı Beynəlxalq Multikulturalizm Mərkəzi, Beynəlxalq Münasibətlərin Təhlili Mərkəzi, G20 Dialoq Forumu və İslam Əməkdaşlıq Təşkilatının birgə təşkilatçılığı ilə keçirilib. Tədbirdə 50-dən çox ölkədən nümayəndələr iştirak edib.
Konfransda çıxış edən Prof. Dr. Hüseyin Işıksal sözlərinə Azərbaycanın müstəqillik gününü təbrik etməklə başlayıb. O bildirib ki, Türkiyə, Azərbaycan və Quzey Kıbrıs Türk Cümhuriyyəti “bir millət, üç dövlət” fəlsəfəsi ilə hərəkət edir və bu xalqlar arasındakı dərin qardaşlıq bağları sarsılmaz münasibətləri və ortaq taleni formalaşdırır.
Prof. Dr. Işıksal qeyd edib ki, can və qardaş Azərbaycan xalqının milli günü Kipr türklərinin də milli günüdür. O, Quzey Kıbrıs Türk Cümhuriyyətinin 1960-cı ildə qurulan Kipr Respublikasından silah gücü ilə çıxarıldığını və rumların hökmranlığını, azlıq statusunu qəbul etmədiyi üçün bu günə qədər davam edən qeyri-insani və beynəlxalq hüquqa zidd embarqolara məruz qaldığını vurğulayıb.
Professor bildirib ki, azad hərəkət, birbaşa ticarət, beynəlxalq idman və mədəni fəaliyyətlərdə iştirak kimi ən fundamental insan hüquqları siyasətə alət edilməməlidir. O, Prezident Ersin Tatarın vəzifəyə başladığı gündən bəri Kipr Türk xalqına qarşı aparılan haqsızlıqlara qarşı yeni bir siyasət həyata keçirdiyini bildirib. Bu siyasət beynəlxalq hüquq qarşısında bərabər status və suveren bərabərliyə əsaslanır.
Prof. Dr. Hüseyin Işıksal çıxışında Quzey Kıbrıs Türk Cümhuriyyəti haqqında da ətraflı məlumat verib. O, Quzey Kıbrıs Türk Cümhuriyyətinin müstəqil dövlətin malik olması lazım olan bütün xüsusiyyətlərə sahib olduğunu, dünyanın 20-dən çox ölkəsində nümayəndəliyinin fəaliyyət göstərdiyini və tam təşkilatlanmış demokratik dövlət olduğunu qeyd edib. O vurğulayıb ki, Quzey Kıbrıs Türk Cümhuriyyəti müasir hava limanı, təhsil müəssisələri və turizm obyektləri ilə dünya ilə bütün sahələrdə inteqrasiyaya hazırdır.
Çıxışının sonunda Prof. Dr. Işıksal bildirib ki, Quzey Kıbrıs Türk Cümhuriyyəti müsəlman ölkələrdən tətbiq edilən embarqoların aradan qaldırılması üçün dəstək gözləyir. O, qeyd edib ki, İslam ölkələri fərdi maraqlarını kənara qoyub, ümumi maraqlar üçün birləşmədiyi müddətdə İslamofobiya ilə mübarizədə nəticə əldə etmək mümkün olmayacaq.
Hüseyn Işıksal onu da vurğulayıb ki, Kipr türklərinin adada apardığı mübarizə yalnız onların öz mübarizəsi deyil. Bu müqəddəs və şərəfli mübarizə eyni zamanda adada türk və müsəlman kimliyini inkar edənlərə qarşı aparılır. Bu səbəbdən o, çıxışında Quzey Kıbrıs Türk Cümhuriyyətinin İslam Əməkdaşlıq Təşkilatına tam hüquqlu üzv qəbul olunması çağırışını da səsləndirib
Fatimə Nəbiyeva
14:32 29.05.2025
Oxunuş sayı: 1683
