Türkiyəli politoloq rəsmi İrəvanın sülhlə bağlı mövqeyini şərh etdi: “Real deyil”
Ermənistanın xarici işlər naziri Ararat Mirzoyan rusiyalı həmkarı Sergey Lavrovla birgə mətbuat konfransında bildirib ki, Ermənistan və Azərbaycan arasında sülh sazişinin imzalanması realdır
"Sülh sazişinin imzalanması reallığa çevriləcək. Bir daha vurğulamaq istərdim ki, bütün çətinliklərə və mövcud çağırışlara baxmayaraq, Ermənistan regionumuzda (Cənubi Qafqazda) davamlı sülhə nail olmaq üçün səylərini davam etdirir. Fikrimizcə, bu, bilavasitə qonşuluğumuzda olan bütün ölkələrin maraqlarına uyğundur", - Mirzoyan qeyd edib.
Azərbaycanın xarici siyasətində əsas prioritetlərdən biri Ermənistanla sülh sazişinin imzalanmasıdır. Bunu dünya ölkələri kimi, İrəvan özü də bilir. Ermənistan sözləri sülhdə səmimi olduğuna dair fikir yaratmağa çalışır. Amma əməldə bunu göstərmir. Belə ki, Azərbaycanın səmimiliyi ilə yanaşı, şərtləri də Ermənistana aydındır. Amma İrəvan həmin şərtləri sanki görməzdən gəlir və tələsir.
Türkiyəli politoloq, professor Mehmet Yüce Crossmedia.az-a açıqlamasında Mirzoyanın dediklərini şərh edib: “Ermənistanlı nazirin Azərbaycanla sülh sazişinin yaxın gələcəkdə mümkün olması ilə bağlı açıqlaması indiki məqamda o qədər də real görünmür. Belə bəyanatları əvvəllər də dəfələrlə Ermənistanın baş naziri Paşinyan səsləndirib. Məlum olduğu kimi, Ermənistan və Azərbaycan sülh sazişinin yekun mətni üzərində razılığa gəlsələr də, hələ ki, sülhün çox yaxın olduğunu söyləmək mümkün deyil. Çünki iki ölkə arasında sülhün əsasını təşkil edən fundamental məsələlərdə hələ də fikir ayrılığı var. Azərbaycanın qəti sülh sazişi üçün üç mühüm şərti var. Bunlardan birincisi Ermənistan Konstitusiyasında Azərbaycana qarşı ərazi iddialarının aradan qaldırılması. Məlum olduğu kimi, Ermənistan konstitusiyasında Qarabağın müstəqilliyinin elan edilməsinə işarə edilməsi Ermənistanın Azərbaycandan, hətta Türkiyədən də ərazi tələb etməsi deməkdir. Bura Ermənistanda konstitusiya dəyişikliyi də daxildir. Ermənistan hələlik bu məsələ ilə bağlı heç bir addım atmayıb. Hətta israr edir ki, konstitusiya dəyişikliyi növbəti məsələdir”.
Müsahibimizin fikrincə, ikinci məqam disfunksional olduğu elan edilən ATƏT-in Minsk Qrupunun tamamilə buraxılmasıdır: “Ermənistanın bu məsələdə mövqeyi aydın deyil. Bu məsələni cənab Əliyev belə ifadə etdi. Bu iki məsələ ilə bağlı lazımi və kifayət qədər konkret addımlar atılmadıqca, Azərbaycan sülhə imza atmayacaq. Azərbaycan Prezidenti İlham Əliyev də bildirib ki, Bakı bunlardan başqa heç bir əlavə şərt irəli sürmür və prosesin başa çatması İrəvanın bu məsələlərlə bağlı atacağı addımları müəyyən edəcək. Ona görə də Azərbaycan və Ermənistan arasında əhəmiyyətli irəliləyiş əldə olunsa da, qəti sülh sazişinə nikbin baxmaq hələ tezdir. Bu baxımdan Ermənistanın ardıcıl siyasət yürütməməsi, Qərbin Cənubi Qafqazda Ermənistana, xüsusilə Fransaya təsir dairəsi yaratmaq istəyi, diaspor təzyiqləri mühüm amillərdəndir”.
Kənan Novruzov
22:15 21.05.2025
Oxunuş sayı: 20413
