Cahangir Məmmədli: “Məncə, Türk dövlətlərinin birgə universiteti Şuşada olacaq”
Özbəkistan Prezidenti Şavkat Mirziyoyev mayın 21-də Macarıstanın paytaxtı Budapeştdə keçirilən Türk Dövlətləri Təşkilatının (TDT) Dövlət Başçıları Şurasının qeyri-rəsmi Zirvə görüşündə deyib ki, Türk Dövlətlərinin birgə universitetinin yaradılması planlaşdırılır.
Özbəkistan lideri bununla türk dövlətlərinin elm sahəsində daha da yaxınlaşacağını vurğulayıb.
O daha sonra Özbəkistanın ötən il Türk Mədəniyyəti və İrsi Fonduna üzvlük istiqamətində atdığı addıma da diqqət çəkərək qeyd edib ki, bu, mədəni münasibətlərin inkişafı baxımından ölkə üçün önəmlidir.
Türk dünyasında elm və təhsil sahəsində əməkdaşlığın daha da dərinləşdirilməsi istiqamətində mühüm addım atılacağı gözlənilir. Özbəkistan Prezidenti Şavkat Mirziyoyev bildirib ki, Türk Dövlətlərinin birgə universitetinin yaradılması planlaşdırılır. Bu təşəbbüs ortaq təhsil platformasının qurulması və türk dövlətləri arasında strateji əlaqələrin gücləndirilməsi baxımından əlamətdar hadisə kimi qiymətləndirilir.
Filologiya elmləri doktoru, professor Cahangir Məmmədli Crossmedia.az-a açıqlamasında Türk Dövlətləri Təşkilatının Türk Dövlətləri Birliyinə çevrilməsi prosesi, bu istiqamətdə görülən işlər və türk xalqları arasında əməkdaşlığın genişlənməsi barədə fikirlərini bölüşüb.
C.Məmmədlinin sözlərinə görə, Türk Dövlətləri Birliyinin formalaşması ideyası ilk olaraq Azərbaycan Prezidenti İlham Əliyevin təşəbbüsü ilə ortaya çıxıb: “Ümumiyyətlə, Türk Dövlətləri Birliyi ideyası əslində bizim Prezident İlham Əliyevin təşəbbüsü ilə yarandıb. Bu təşəbbüs təkcə siyasi yox, həm də mədəni və iqtisadi əməkdaşlığın güclənməsi baxımından əhəmiyyətlidir. Orta Asiya respublikaları – Qazaxıstan, Özbəkistan, Türkmənistan və Qırğızıstan Azərbaycanla həm tarixi-mədəni, həm də coğrafi baxımdan sıx bağlı olan dövlətlərdir. Bu ölkələr bir-birilə mədəniyyət və iqtisadi əlaqələrini daha da gücləndirir. Bu dövlətlər əslində bir-biri ilə mədəniyyət və iqtisadiyyat əlaqələrini daha çox gücləndirirlər”.
C. Məmmədli bildirib ki, Türk Dövlətləri Birliyi çərçivəsində təhsil və mədəniyyət sahəsində də vacib təşəbbüslər irəli sürülür: “Özbəkistan Prezidenti Şavkat Mirziyoyevin Cəbrayılda məktəb inşa etdirməsini bu ölkənin Azərbaycana olan dostluq və ehtiramının göstəricisidir. Bu əməkdaşlığın daha yüksək səviyyəyə çatdırılması üçün universitetlərin yaradılması vacib addımdır”.
O, Mirziyoyevin Türk Dövlətləri Universitetinin yaradılması təşəbbüsünü yüksək dəyərləndirərək bildirib ki, bu cür universitet Şuşada tikilə bilər: “Bu həm Azərbaycan, həm də digər türk dövlətləri üçün ciddi əhəmiyyətə malik olacaq. Mənə elə gəlir ki, Türk Dövlətləri Universiteti Şuşada tikiləcək. Və bu universitet birliyin möhkəmlənməsinə böyük töhfə verəcək. Elm, təhsil sahəsində universal əməkdaşlığın əsasını qoyacaq”.
Fatimə Nəbiyeva
20:36 21.05.2025
Oxunuş sayı: 1193
