Mənim xonçam gözəldir”- Novruz festivalı
Yazın gəlişini və Novruz bayramını qeyd etmək məqsədilə Bakı şəhər, Dəniz vağzalında keçirilən “Mənim xonçam gözəldir” festivalı bu il də möhtəşəm görüntülərlə yadda qaldı. Festival mart ayının 15-i və 16-sı təşkil olundu. Festivalda milli dəyərlərimiz, qədim adət-ənənələrimiz, incəsənət və mədəni irsimiz geniş şəkildə təqdim olundu.
Crossmedia.az xəbər verir ki, tədbirin təşkilatçısı Leyla Həsən tədbirin əhəmiyyəti barədə fikirlərini bölüşərək bildirib:
“Məqsədimiz təkcə gözəl xonçalar sərgiləmək deyil, həm də Novruzun dərin mənəvi anlamını vurğulamaqdır. Biz istəyirik ki, gənc nəsil öz köklərinə bağlı olsun, milli dəyərlərimizi yaşatsın və gələcək nəsillərə ötürsün. Bu festival bizim kimliyimizi, türk dünyasının birliyini, incəsənətimizi və mədəniyyətimizi bütün dünyaya tanıtmaq üçün bir körpüdür. Həmçinin məqsədimiz kiçik bizneslə məşğul olan xanımlara da dəstək olmaqdır.”
Festivalda sənətkarların əl işlərindən ibarət sərgilər xüsusi maraq doğurdu. Burada kəlağayı ustalarının yaratdığı incə naxışlı ipək şallar, taxta oyma sənətkarlarının hazırladığı dekorativ nümunələr və keramika ustalarının əl işləri nümayiş olundu. Ziyarətçilər Lətif Kərimovun nəvəsi Azər Səfərovun təqdim etdiyi rəsm əsərləri ilə yaxından tanış oldular. Bununla yanaşı, bitkilərdən toxunmuş xalçada ziyarətcilərin marağına səbəb oldu. Azər bəy həmin xalçanın hazırlanmasına 3 il vaxt sərf etdiyini də qeyd edib.
Festivalda milli musiqilər xüsusi yer tuturdu. Qədim Azərbaycan musiqi alətlərindən olan tar, kamança və balaban sədaları altında tamaşaçılar kiçik rəqqasələrin ifasında milli rəqsləri izlədilər. Xüsusilə türk dünyasının birliyini tərənnüm edən rəqslər tamaşaçılar arasında böyük coşqu ilə qarşılandı.
Əsas müsabiqə olan “Mənim Xonçam Gözəldir” yarışında iştirakçılar öz bəzədilmiş xonçalarını təqdim etdilər. Xonçalarda səməni, şirniyyatlar, boyanmış yumurtalar və digər Novruz atributları yer almışdı.
Festivalın sonunda bütün iştirakçılar və tamaşaçılar “Yallı” rəqsi ifa edərək birlik və həmrəyliyin simvolunu nümayiş etdirdilər. Novruzun ruhi dəyəri, insanları bir araya gətirməsi, milli kimliyimizin qorunmasına verdiyi töhfə festivalda bir daha vurğulandı.
“Mənim xonçam gözəldir” Novruz festivalı bir daha sübut etdi ki, Azərbaycan mədəniyyəti zəngin irsi ilə gələcək nəsillərə ötürüləcək, ənənələrimiz yaşadılacaq və türk dünyasının birliyi hər zaman qorunacaqdır.
Fatimə Məmmədli
10:35 17.03.2025
Oxunuş sayı: 1622
