Afaq Bəşirqızı: “Teatrlarda çəkişmə, intriqa deyil, sənət naminə nələrsə etmək əsas olmalıdır”
Bu gün Xalq artisti Bəşir Səfəroğlunun anadan olmasının 100 ili tamam olur. Bu münasibətlə Akademik Musiqili Teatrın kollektivi, həmçinin B.Səfəroğlunun qızı, Xalq artisti Afaq Bəşirqızı, mədəniyyət xadimləri Fəxri Xiyabana gələrək bu dahi şəxsiyyətin məzarını ziyarət ediblər. Onlar Bəşir Səfəroğlunun məzarının üzərinə gül dəstələri qoyublar.
Xalq artisti Afaq Bəşirqızı atasıyla bağlı xatirələrini Crossmedia.az-la bölüşüb: "Təəssüf ki, mən atamı çox az görmüşəm. Çünki məni nənəm böyüdüb. Nənəm isə məni atama qısqanırdı. Nənəm rəhmətə getdikdən sonra atam illərlə çalışdı ki, mən onun yanında olum. Nəhayət, mən də onun yanında oldum. Bir il yarım sonra isə atam rəhmətə getdi.
Bütün bunlara baxmayaraq, bu il yarım ərzində ona bəlkə də cəmi 2-3 dəfə "ata" deyə bildim. Artıq 55 ildir ki, hər gün, 24 saatın ən azı üç saatını "ata" deyirəm. Bu gün isə fəxr edirəm ki, mənim atam Bəşir Səfəroğludur. Çünki hər sənətkar belə yaşaya bilmir. Hər sənətkar ölümündən sonra 55 il yaşaya bilmir. Mən inanıram ki, xalqımız atamı hələ daha 100 il, bəlkə də daha çox yaşadacaq”. O, “bundan sonra istəyirəm ki, hər şey yaxşı olsun, ölkəmizdə əmin-amanlıq hökm sürsün. Cavanlarımız şad-xürrəm böyüsünlər" deməklə atasıyla bağlı xatirələrini yekunlaşdırıb.
Daha sonra Xalq artisti Afaq Bəşirqızı ölkəmizdə teatrların durumuyla bağlı da münasibət bildirib: “Teatrlarımızda çətinliklər çoxdur, amma harada yoxdur ki, çətinlik? Buna baxmayaraq Akademik Musiqili Teatrda tamaşa olan günlər – yəni, cümə, şənbə və bazar günləri gəlib baxsanız, görərsiniz ki, kifayət qədər tamaşaçı var".
O bunların səbəbini də izah edib: "Bu, repertuardan və həmçinin aktyorların məsuliyyətindən asılıdır. Ona görə də mən istəyirəm ki, bütün teatrlarda çəkişmə, intriqa və ya anonim məktublardansa, açıq-açıq sənət üçün yaşamaq sənət naminə nələrsə etmək əsas olsun. Çünki mədəniyyət gələcəkdir. Xalq və mədəniyyət – bunlar paraleldir".
Fatimə Məmmədova,
Xumar Əhmədova
18:17 11.03.2025
Oxunuş sayı: 23766
