Ermənistan "xroniki xəstəliyindən" qurtulur: Region "sağalır"
Bakı Hərbi Məhkəməsində keçirilən prosesdə təqsirləndirilən Arkadi Qukasyan “Böyük Ermənistan” ideyasını nağıl adlandıraraq, bu ideya ilə heç vaxt real yanaşmadığını bildirib.
Belə ki, o, “Böyük Ermənistanla” bağlı sualı cavablandırarkən, uzun müddətdir nağıllara inanmığını və ideyanın sadəcə bir xəyaldan ibarət olduğunu vurğulayıb.
Məlum olduğu kimi, Ermənistan siyasətçiləri uzun illər "Böyük Ermənistan" ideyası ilə yaşayıblar. "Dənizdən - dənizə Ermənistan" layihəsi rəsmi İrəvanın "xroniki xəstəliyi" olub. Ancaq, deyəsən, bu "xəstəlik" aradan qalxmaqdadır.
Bu barədə Crossmedia.az-a danışan Milli Məclisin deputatı Azər Allahverənov Böyük Ermənistan ideyasının Ermənistanın milli ideologiyasının ana xəttini təşkil etdiyini və bu məsələnin heç kəsə sirr olmadığını vurğulayıb: "Ermənistanda hansı səviyyədə və əhalinin hansı kateqoriyasına aid olursa olsun, insanlar "Böyük Ermənistan"ın bir xülya olduğunu çox yaxşı başa düşürlər. Hətta bəzi siyasi qruplar da zaman-zaman bu məsələ ilə bağlı fikirlərini dilə gətirirlər. Lakin bu, sadəcə bir nağıldır və müəyyən siyasi qüvvələr bu nağılı təbliğ etməklə kütləni yönləndirməyə çalışırlar. Bəzi hallarda hətta qonşu ölkələrinə qarşı ərazi iddialarını belə bu nağıl ilə əsaslandırmağa cəhd edirlər. Bu ideyanın bir xülya olduğunu tarixçilər və hətta bölgəyə aid olmayan alimlər də sübuta yetiriblər".
Deputatın fikrincə, "Böyük Ermənistan" ideyasını həyata keçirmək cəhdi Türk dünyasını parçalamağa yönəlib: "Ermənistan cəmiyyəti bu ideyanın bir nağıl olduğunu qəbul etsə də, bu ideoloji xəttin üzərindən ölkə öz xarici siyasətini qurur. Lakin bu xülya bir siyasi manevr olmamalıdır. Ermənistan rəhbərliyi artıq bu həqiqəti qəbul etməlidir. Ermənistanın baş naziri də artıq Böyük Ermənistan ideyasından uzaq durmağa çağırır və real Ermənistan barədə düşünməli olduğunu bildirir".
A.Allahverənov qeyd edib ki, bunun Ermənistan üçün ağrılı olmasına baxmayaraq, rəsmi İrəvanın gələcəyi məhz acı həqiqəti anlamaqdan keçir: "Ermənistan əgər bu həqiqəti qəbul edərsə və xarici siyasətini Böyük Ermənistan xülyasından uzaq bir şəkildə qurarsa, inkişafa doğru irəliləyə bilər. Əks halda, yenə utopiya, fiasko və həmişə qonşu ölkələrə ərazi iddiaları edən bir Ermənistanla qarşılaşacağıq".
Fatimə Məmmədova
17:31 10.03.2025
Oxunuş sayı: 25765
