"Ermənistanın törətdiyi cinayətlər araşdırılmalıdır"- RƏY
İtkin düşmüş Şəxslər üzrə Beynəlxalq Komissiyanın (ICMP) "Azərbaycan Respublikasında itkin düşmüş şəxslərin axtarışı üzrə qiymətləndirmə hesabatı"nın təqdimatında Dövlət Təhlükəsizliyi Xidmətinin (DTX) rəis müavini general-leytenant Şərafət Həsənov çıxış edərək bildirib ki, münaqişə davam etdiyi müddətdə Ermənistan silahlı birləşmələri tərəfindən etnik təmizləmə və soyqırımı cinayətləri törədilib.
O bildirib ki, mülki azərbaycanlı əhali kütləvi şəkildə qətlə yetirilib, əsir-girov götürüldükdən sonra qeyri-insani şəkildə saxlanılaraq dəhşətli işgəncələrə və məhrumiyyətlərə, humanizm prinsiplərindən kənar rəftara məruz qoyulub: "Bütün bu hallar vətəndaşlarımızın itkin düşməsinə və taleyinin bu günə kimi qeyri-müəyyən qalmasına səbəb olub".
General-leytenant qeyd edib ki, 1988-ci ildən etibarən Ermənistanın Azərbaycana qarşı irəli sürdüyü əsassız ərazi iddiaları və həyata keçirdiyi işğal faktı ilə bağlı Azərbaycan silahlı münaqişəyə cəlb edilib və bunun da nəticəsində genişmiqyaslı humanitar fəlakətlə üzləşib.
"Hərbi əməliyyatlar nəticəsində 19 mindən artıq vətəndaşımız öldürülüb və ya itkin düşüb. 65 mindən artıq insan müxtəlif bədən xəsarətləri alıb. 900-dən çox yaşayış məntəqəsi tamamilə dağıdılıb, ərazilərin infrastrukturuna və ekologiyasına milyardlarla dollarla ölçülən ziyan vurulub, 10 min hektarlarla ərazi mina və partlamamış hərbi sursatlarla çirkləndirilib", - Ş.Həsənov vurğulayıb.
Bu məsələ ilə bağlı Crossmedia.az-a açıqlama verən Milli Məclisin deputatı Aydın Mirzəzadə bildirib ki, sözügedən cinayətlərin araşdırılmasın və müvafiq hüquqi nəticələrin çıxarılmasın vacibdir: "Azərbaycan haqq mübarizəsini beynəlxalq hüquq çərçivəsində davam etdirəcək. Ermənistan çox istəyərdi ki, Azərbaycan bu məsələ barəsində ciddi mövqe tutmayaydı və itkiləri sadəcə müharibənin adı ilə bağlayaraq, hər bir insanın taleyini həll etməyə çalışmayaydı. Amma hər bir vətəndaşımız bizim üçün əzizdir. Odur ki, məsələnin hüquqi tərəfi aydınlaşdırılmalıdır.”
A. Mirzəzadə, həmçinin qeyd edir ki, Qarabağ müharibəsi zamanı Ermənistan silahlı qüvvələrinin törətdiyi insanlığa qarşı cinayətlər, Azərbaycan xalqının tarixində silinməz izlər buraxıb: “İnsanlarımız əsir düşüb, işgəncələrə məruz qalıb. Onların taleyinin müəyyənləşdirilməsi üçün Azərbaycan dövləti əzmlə işləyib".
Bundan əlavə deputat Ermənistanın daşıdığı məsuliyyətə də diqqət çəkib: "İstəyirik ki, Ermənistan bu məsələdə ciddi mövqe tutsun. Əgər onlar bu cinayətlərdə əli olmadığını iddia edirlərsə, konkret məlumatlar təqdim etməlidirlər. Hər bir itkinin taleyinin aydınlaşdırılması bizim borcumuzdur.”
Ermənistanın təqdim etdiyi siyahıların dəqiqliyi ilə bağlı böyük şübhələr olduğunu vurğulayan deputat Azərbaycanın hazırladığı siyahının daha konkret və etibarlı olduğunu qeyd edib: “Bizim təqdim etdiyimiz dörd minlik siyahı əsas götürülərək aydınlaşdırma aparılmalıdır. Hər bir şəxsin taleyinin müəyyən edilməsi, həm də həmin cinayətlərin cəzalandırılması Azərbaycan dövlətinin əsas prioritetlərindəndir.”
Nigar Yahyazadə
16:48 10.03.2025
Oxunuş sayı: 15894
