Aİ-dən növbəti təxribat: Azərbaycanla Ermənistan arasında "qara tikan"
Avropa İttifaqının (Aİ) Ermənistandakı "müşahidə missiyası"nın Azərbaycanla şərti sərhəddə avantürist addımları davam edir. Bu dəfə daha bir qrup Qazax rayonu istiqamətinə gəlib. “Müşahidə missiyası”nın nə məqsədlə gəlməsi və müşahidələr aparması suallar doğurur. Həm Azərbaycan, həm də Ermənistan tərəfi açıqlamalarında danışıqların 3-cü tərəf olmadan aparılmasında maraqlı olduqlarını bildiriblər. Lakin bu, həm Ermənistanın açıqlamalarına zidd addımdır, həm də danışıqlar prosesinə mənfi təsir göstərə bilər.
Müşahidə missiyası həqiqətən müşahidə aparmaq məqsədiləmi gəlib? Bu müşahidənin aparılmasına zərurət nədən yarandı?
Mövzu ilə bağlı Milli Məclisin deputatı Aydın Hüseynov Crossmedia.az saytına açıqlama verib:
“Aİ-nin Ermənistana geniştərkibli “mülki müşahidə missiyası”nı göndərməsi kökündən yanlış idi və iki ölkə arasında axtarılan sülh yollarında “qara tikan”dan başqa bir şey deyil. Avropanın bu “missiya”nı Ermənistanın Azərbaycanla sərhəd bölgələrində yerləşdirməsi ölkəmizdə haqlı narazılığa səbəb olub. Çünki bu missiyanın mövcudluğu hazırkı dialoq mexanizmlərinə qarşı sui-istifadədir, həm də təhlükəlidir. Burada problem sərhəd məsələsi deyil, çünki iki ölkənin sərhədində demarkasiya və delimitasiya prosesi həyata keçirilir. Müharibə riski də yoxdur, Azərbaycan eskalasiyanı istəmir, Ermənistan isə çox zəifdir. Praqa görüşündən sonra Avropa İttifaqının Ermənistana 40 nəfərlik müşahidə missiyası göndərməsi ilə hər şey dəyişdi. Sonra müşahidəçilərin sayı 100-ə, daha sonra isə 209-a çatdırılıb”.
"Azərbaycanın icazə vermədiyi “mülki müşahidə missiyası”nın tərkibinə diqqət etsək, onların demək olar ki, hamısı kəşfiyyatçı-jandarmlar, keçmiş polis əməkdaşları və dəniz piyadalarıdır. Bu kateqoriyadan olan “müşahidəçilər”in sərhədlərimizin o tərəfində yerləşdirilməsi Aİ-nin xoş məramından xəbər vermir. Bu, gələcək sülh danışıqlarına böyük problemlər yaradır. Qərb bununla gizli oyunlarla yox, açıq kartla oynayır. Əvvəllər Ermənistana gizli şəkildə dəstək verən Qərb bu gün açıq mətnlə danışır. Ermənistana maliyyə yardımı ayıran avropalılar işğalçı ölkəni müxtəlif üsul və yollarla silahlandırır, üstəlik, masada baş tutan danışıqlarda açıq ermənipərəst mövqe tuturlar. Bu da Ermənistandakı revanşistlərə qol-qanad verir. Bu halda Aİ və ABŞ Ermənistanın sabitliyini pozan hər hansı mümkün hərəkətinə görə məsuliyyəti bölüşəcəklər. "Müşahidə missiyası"nın Ermənistanın Azərbaycanla şərti sərhədinin Qazax rayonu istiqamətinə gəlmələri guya delimitasiya və demarkasiya ilə bağlıdır Amma söylədiyim kimi, bu, Aİ-nin növbəti təxribata hazırlığı da ola bilər”.
Ayhan Ağarzayev
12:13 06.03.2025
Oxunuş sayı: 10870
