Mədəniyyət Nazirliyi regionlarda tarixi-mədəni irsin bərpa-konservasiyası üzrə layihələr hazırlayır
Mədəniyyət Nazirliyi tərəfindən regionlarındakı tarixi-mədəni irsin bərpa və konservasiyası üzrə layihələrinin hazırlanması ilə bağlı iş aparılır.
Crossmedia.az xəbər verir ki, bu istiqamətdə bir sıra abidənin bərpa layihələrinin hazırlanması ilə bağlı proses davam etdirilir.
Sorğuya cavabda həm Mədəniyyət Nazirliyi, həm də Heydər Əliyev Fondu tərəfindən azad olunmuş ərazilərdəki bərpa-konservasiya istiqamətindəki işlərə toxunulub:
“Ötən müddətdə Ağdam şəhərində İmarət Kompleksi Mədəniyyət Nazirliyi tərəfindən bərpa olunub. Eyni zamanda Xankəndi şəhərində yerləşən Dövlət Dram Teatrı binasının bərpa layihəsi hazırlanıb. Xocalı rayonundakı Əsgəran qala-kompleksinin bərpa layihəsinin hazırlanması üzrə işlər davam etdirilir”.
Həmçinin qeyd olunub ki, Heydər Əliyev Fondu tərəfindən Şuşada Molla Pənah Vaqifin muzey-məqbərə kompleksi, Yuxarı Gövhər ağa və Aşağı Gövhər ağa, Mamayı, Saatlı məscidləri, eləcə də Ağdam Cümə məscidi bərpa olunub:
“Zəngilanda tarixi məscidin qalıqları konservasiya edilib və bu ərazidə yeni məscid inşa olunub, Şuşada Çöl Qala məscidinin, Ağdamda Qiyaslı, Xocalıda Malıbəyli məscidlərinin bərpası isə davam etdirilir. Bundan əlavə, Fond tərəfindən Üzeyir Hacıbəylinin Şuşadakı heykəli, Molla Pənah Vaqifin büstü, Üzeyir Hacıbəylinin Şuşa şəhərindəki ev-muzeyi, Mehmandarovların malikanə kompleksi, Xalça Muzeyinin filialı, Şirin su hamamı bərpa edilib”.(Report)
12:42 27.02.2025
Oxunuş sayı: 816
