Hava xəbərləri ilə bağlı yenilik - artıq buradan…
Süni intellekt texnologiyalarının inkişafı hava şəraitinin proqnozlaşdırılmasında da yeni imkanlar yaradıb. Müasir süni intellekt əsaslı sistemlər böyük həcmdə meteoroloji məlumatları emal edərək qısa müddətdə hava şəraiti ilə bağlı proqnozlar hazırlaya bilir. Bu texnologiyaların inkişafı ənənəvi meteoroloji üsullarla yanaşı, alternativ proqnozlaşdırma imkanlarının da genişlənməsinə səbəb olub.
Xüsusilə qısa müddətdə böyük həcmdə məlumatın təhlil edilməsi hava proqnozlarının hazırlanmasında süni intellektin imkanlarını önə çıxarır. Lakin hava şəraitinin yerli coğrafi və atmosfer xüsusiyyətlərindən asılı olması bu cür sistemlərin təqdim etdiyi nəticələrin dəqiqliyi məsələsini gündəmə gətirir. Bəs süni intellektin hazırladığı hava proqnozlarına nə dərəcədə etibar etmək olar?
Mövzu ilə bağlı Crossmedia.az-a açıqlama verən ekoloq Sadiq Həsənov bildirib ki, süni intellektin hava proqnozlaşdırılması sahəsində imkanları genişlənib:
"Süni intellektin son dövrlərdə QrafCast (GraphCast), GenCast kimi proqramları var. Bu proqramlar kifayət qədər sürətli şəkildə analitik məlumatları toplamaqla yanaşı, dünyanın mərkəzləşdirilmiş hidrometeoroloji mərkəzlərinin informasiyalarını bir araya gətirərək hava proqnozu verə bilir. İndi bu avtomatik axtarış sistemləri elə səviyyədədir ki, həmin proqramlar vasitəsilə süni intellektə daxil olub qısa müddət – bir neçə dəqiqə ərzində hava proqnozunu almaq mümkündür. Ancaq bu o demək deyildir ki, süni intellektin verdiyi proqnozlar tam dəqiq olur. Çünki süni intellekt başqa mənbələrin məlumatlarından, aparıcı hidrometeorologiya institutlarının göstəricilərindən istifadə edir. Həmin proqnozlar isə proqnoz istənilən yerin yerli şəraitinə hər zaman uyğun gəlməyə bilər".
Ekoloq qeyd edib ki, hidrometeoroloji proqnoz vermək üçün xüsusi institutlar fəaliyyət göstərir. Orada havanın rütubətliliyi, küləyin əsməsi üçün temperatur və atmosfer təzyiqi fərqi müəyyən dərəcədə qiymətləndirildikdən sonra proqnoz verilir. Bu məlumatlar bir neçə mərhələdə dəqiqləşdirildikdən sonra təqdim olunduğu üçün daha etibarlı sayılır. Düşünürəm ki, süni intellektdən qısa müddətli məlumat almaq mümkündür, ancaq onun tam dəqiqliyinə zəmanət vermək olmaz.
Zeynəb Həsən
15:00 29.09.2026
Oxunuş sayı: 51
