Türk dünyasının bəstəkarları Bakıda: Ortak musiqi irsi səhnədə
Azərbaycan Dövlət Akademik Filarmoniyasında keçirilən festival Türk dünyasının bəstəkarlarını və musiqi irsini bir araya gətirib. Festivalın açılış konsertində Azərbaycanla yanaşı, Türkiyə, Qazaxıstan, Qırğızıstan, Türkmənistan, Özbəkistan və Macarıstandan dəvət olunmuş bəstəkarların əsərləri səsləndirilib. Proqramda Azərbaycan musiqisinin klassik nümunələrinə də yer verilib və Üzeyir Hacıbəylinin “Koroğlu” operasından üvertura, Müslüm Maqomayevin “Şahsənəm” operasından üvertura təqdim olunub.
Belə festivallar yalnız musiqi əsərlərinin təqdimatı ilə məhdudlaşmır, müxtəlif türk xalqlarının bəstəkarlarını, ifaçılarını və musiqi məktəblərini bir araya gətirərək yaradıcılıq mübadiləsi üçün imkan yaradır. Festival çərçivəsində səslənən əsərlər həm Türk dünyasının ortaq mədəni bağlarının, həm də ayrı-ayrı ölkələrin özünəməxsus musiqi ənənələrinin təqdimatı baxımından diqqət çəkib.
Mövzu ilə bağlı bəstəkar Ceyhun Allahverdiyev Crossmedia.az-a açıqlamasında bildirib:
“Dünən İranda Türk dövlətlərinin bəstəkarları, hətta Bəstəkarlar İttifaqı səviyyəsində onların nümayəndələri dəvət olunmuşdu. Azərbaycan Dövlət Akademik Filarmoniyasında festivalın açılışı ilk olaraq elə konsertlə, onların əsərləri ilə başladı. Proqramda bizim bəstəkarlardan Üzeyir Hacıbəylinin “Koroğlu” operasından uvertura, Müslüm Maqomayevin “Şahsənəm” operasından uvertura səsləndi. Qalan bütün əsərlər isə türk bəstəkarlarına – Türkiyə, Qazaxıstan, Qırğızıstan, Türkmənistan, Özbəkistan, hətta Macarıstandan dəvət olunmuş bəstəkarlara aid idi. Bu, böyük bir hadisədir. Belə bir birliyin yaranması, mədəni əlaqələrin genişlənməsi çox yaxşıdır. İndi bizim əlaqələrimiz həm siyasi, həm də coğrafi cəhətdən bir-birinə daha da yaxınlaşır. Mədəniyyəti qoruyub saxlamaq Azərbaycan və ümumən Türk dövlətləri üçün də çox əhəmiyyətli məsələdir. Arzu edərdim dünənki konsertdə bizim bəstəkarlara bir az da artıq yer veriləydi. Müasir bəstəkarlarımızın və ya digər bəstəkarlarımızın da əsərləri o konsertdə səslənərdi. Əlbəttə, yəqin ki, proqramın genişliyi, çoxluğu da buna mane olub. Arzu olunur ki, gələcəkdə bizim yeni nəsil bəstəkarların da əsərləri təqdim olunsun. Mənim bu yaxınlarda Qəbələ festivalında qələbəmizə həsr olunmuş üverturam səsləndi. Bizim yeni, yaradıcılıqla məşğul olan başqa bəstəkarlarımız da var. Çox arzulayardıq ki, bu əsərlər bir-birinin ardınca Daşkənddə və digər Türk dövlətlərində səslənsin, eləcə də onların əsərləri bizdə səslənsin. Mədəni əlaqələr genişləndikcə mədəniyyət daha da gözəlləşir və zənginləşir. Ona görə də bu festivalın keçirilməsini bir musiqiçi, bəstəkar kimi alqışlayıram".
Zeynəb Həsən
19:00 19.09.2026
Oxunuş sayı: 47
