Azərbaycan regionda gərginliyin azaldılmasında mühüm rol oynayır - Əraqçı
İranın xarici işlər naziri Abbas Əraqçı Tehranın müharibə və nüvə silahı əldə etmək niyyətində olmadığını, əsas xəttin diplomatiya olduğunu bəyan edib. O bildirib ki, İran istənilən ssenariyə hazırdır və heç kimin ölkəyə qarşı güc tətbiq etmək fikrinə düşməsinə imkan verməyəcək.
Bu barədə crossmedia.az xarici KIV-ə istinadən xəbər verir.
Əraqçının sözlərinə görə, Tehran ABŞ-a etimad göstərmir və mümkün manipulyasiya cəhdlərini istisna etmir. Bu səbəbdən də İranın dövlət strukturları danışıqlar mövcud deyilmiş kimi fəaliyyət göstərir. Nazir Vaşinqtonla birbaşa danışıqların aparılmadığını, yalnız diplomatik etiket çərçivəsində formal təmasların olduğunu təsdiqləyib.
İran XİN rəhbəri ABŞ hərbi strukturlarının, o cümlədən CENTCOM komandanlığının danışıqlarda iştirakını qəti şəkildə rədd edib. Onun fikrincə, hərbçilər diplomatik prosesin tərəfi ola bilməz.
Əraqçı vurğulayıb ki, dinc nüvə proqramı və uranın zənginləşdirilməsi İranın qanuni haqqıdır və ölkənin inkişafı üçün strateji əhəmiyyət daşıyır. O qeyd edib ki, Tehran bu hüquq uğrunda ağır bədəl ödəyib və təzyiq və ya müharibə hədələri fonunda geri addım atmaq niyyətində deyil.
Bununla yanaşı, İran qarşı tərəfin narahatlıqlarını aradan qaldırmağa, suallara cavab verməyə və qarşılıqlı etimad qurmağa hazır olduğunu bildirib. Nazir vurğulayıb ki, bunun yeganə yolu hörmətə əsaslanan diplomatiyadır.
Əraqçı çıxışında Azərbaycan və regionun digər altı ölkəsinin gərginliyin azaldılması və sabitliyin möhkəmləndirilməsi istiqamətində göstərdiyi səyləri də yüksək qiymətləndirib. Açıq mesajdır: bölgədə sülh güclə yox, ağılla qurulur.
16:12 08.02.2026
Oxunuş sayı: 449
