Qarabağa qayıdan uşaqlar üçün yeni layihə – Yaradıcılıq dünyası qurulur
"Müasir Yaradıcılığa Dəstək" İctimai Birliyi "Yenidən doğulan torpağın övladları" adlı yaradıcılıq master-klassları layihəsinin icrasına başlayıb.
Crossmedia.az xəbər verir ki, təşəbbüsün əsas məqsədi Qarabağ və Şərqi Zəngəzurda doğma yurdlarına qayıdan uşaqların asudə vaxtını səmərəli və məzmunlu təşkil etmək, onların yaradıcılıq potensialını üzə çıxarmaqdır.
Layihə çərçivəsində tədbirlər Cəbrayıl rayonunun Horovlu kəndində təşkil olunacaq və ustad dərslərinə ətraf ərazilərdə yaşayan gənclər cəlb ediləcək.
Layihə çərçivəsində təşkil olunacaq proqram beş əsas istiqaməti əhatə edir:
- bədii təxəyyülü inkişaf etdirən rəsm,
- mütaliə və yazı bacarıqlarını formalaşdıran ədəbiyyat,
- səhnə nitqini və sosial inteqrasiyanı inkişaf etdirən teatr,
- mənəvi rahatlıq bəxş edən musiqi,
- eləcə də fiziki və ruhi sağlamlığı təşviq edən sağlam həyat tərzi.
Təlimlər uşaqların, gənclərin yaradıcılıq qabiliyyətlərini artırmaqla yanaşı, onların sosiallaşmasına və sağlam həyat tərzi mənimsəmələrinə dəstək verəcək.
Qeyd edək ki, layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirilir.
10:09 13.08.2026
Oxunuş sayı: 40
