“NVIDIA”nın rəhbəri vəzifəsindən uzaqlaşdırıla bilər – Casusluq qalmaqalı
ABŞ-nin texnologiya nəhəngi “NVIDIA”nın Direktorlar Şurası şirkətin təsisçisi və baş icraçı direktoru Censen Huanqın (Jensen Huang) vəzifəsindən uzaqlaşdırılması məsələsini müzakirə etməyə hazırlaşır.
Crossmedia.az xəbər verir ki, “The Wall Street Journal” (WSJ) bu barədə məlumat yayıb.
Nəşrin məlumatına görə, qərar Huanqın nikahdankənar iki münasibəti ilə bağlı yayılan məlumatlar və mümkün xarici kəşfiyyat əlaqələrinə dair araşdırmalar fonunda gündəmə gəlib.
İddialardan biri ABŞ kəşfiyyatının Çin xüsusi xidmət orqanları ilə əlaqədə olmaqda şübhələndiyi qadınla bağlıdır. Söhbət Sinqapurda yerləşən “Megaspeed” şirkətinin rəhbər şəxslərindən biri olan Elis Huanqdan gedir.
İkinci münasibətin isə “NVIDIA”nın səhiyyə istiqamətinə rəhbərlik edən yüksəkvəzifəli əməkdaşı Kimberli Pauell ilə olduğu bildirilir.
Censen Huanq daha əvvəl əməkdaşlarına ünvanladığı məktubda həyat yoldaşına sədaqətsizlik etdiyini etiraf edərək ailəsindən və həmkarlarından üzr istəyib.
Noyabrın 8-də “NVIDIA”nın Direktorlar Şurası Huanqın xarici kəşfiyyat fəaliyyətinin hədəfinə çevrilməsi ilə bağlı məlumatların araşdırılması üçün müstəqil təhqiqata başladığını açıqlayıb.
Şirkət həmin açıqlamada milli təhlükəsizliyə və ya məxfi korporativ məlumatlara zərər dəydiyini düşünmək üçün əsas olmadığını bildirib, Huanqa etimadını ifadə edib.
Lakin son məlumatlara əsasən, Direktorlar Şurası onun şirkətdəki gələcəyini müzakirə etmək qərarına gəlib.
“Reuters” agentliyinin məlumatına görə, məsələ ilə bağlı iclasın keçirilməsi planlaşdırılıb. Xəbərlər fonunda “NVIDIA” səhmləri birjadankənar ticarətdə 8 faizdən çox ucuzlaşıb.
Qeyd edək ki, Censen Huanq 1993-cü ildə “NVIDIA”nın həmtəsisçilərindən biri olub və həmin vaxtdan şirkətin baş icraçı direktoru vəzifəsini tutur.
09:53 12.11.2026
Oxunuş sayı: 45
