Kənd təsərrüfatında iri təsərrüfatların yaranmasına ehtiyac var
Azərbaycanda kənd təsərrüfatı məhsullarının istehsalında artım qeydə alınıb. Ölkədə 8 milyard 797,2 milyon manat dəyərində kənd təsərrüfatı məhsulu istehsal olunub və bu, ötən ilin eyni dövrü ilə müqayisədə real ifadədə 2,8 faiz çoxdur. Artım aqrar sektorun iqtisadiyyatda rolunu bir daha gündəmə gətirir.
İqtisadçı Emin Qəribli Crossmedia.az-a açıqlamasında bildirib ki, 2,8 faizlik artım kifayət qədər yaxşı göstəricidir:
“2,8 faiz yaxşı göstəricidir, kifayət qədər yaxşı nəticədir. Dünyada, dünya iqtisadiyyatında belə volatil bir dövrdür. Bu dövrdə bir çox ölkələrin iqtisadi artımı azalır. Bildiyimiz kimi, bizdə də iqtisadiyyatımıza bu təsirsiz ötüşməyib. Amma kənd təsərrüfatı, hesab edirəm ki, kifayət qədər yaxşı templə artır. Bunun hansı səbəblərdən baş verdiyinə gəldikdə, bildiyimiz kimi, əsasən dövlət tərəfindən son dövrlərdə subsidiyaların artırılması, suvarma sisteminə müəyyən maliyyə resurslarının ayrılmasıdır. Həmçinin bilirik ki, ayrı-ayrı sahələr var ki, kifayət qədər vergi güzəştləri tətbiq olunur və müvafiq ayrı-ayrı sahələr üzrə proqramlar qəbul olunur. Bu da öz nəticəsini göstərir. Burada Qarabağı da qeyd etmək lazımdır”.
E.Qəribli qeyd edib ki, bu suvarma sistemi daha da təkmilləşdirilməli, oraya müvafiq yatırımlar yatırılmalıdır: “Maliyyə resursları yönəldilməlidir. Kənd təsərrüfatı ilə məşğul olan subyektlərin sığorta və müvafiq kreditlərlə təmin olunması məsələsinə baxılmalıdır. Yəni kənd təsərrüfatı ilə məşğul olan şəxslər daha asan yollarla kredit əldə edə bilməlidirlər. Lakin ən vacib məsələlərdən biri də budur ki, biz dünyaya baxsaq, ixrac edən kənd təsərrüfatlarına baxsaq, bunların iri təsərrüfatlar olduğunu görərik. Hesab edirəm ki, kənd təsərrüfatında iri təsərrüfatların yaranmasına ehtiyac var. Onlar stimullaşdırılmalıdır. Onlara güzəştlər verilməlidir ki, iri təsərrüfatlar yaransın. O halda bizim ixrac potensialımız da artar, iqtisadi artım daha yüksək templərlə davam edər”.
Zərnigar Hüseynli
20:00 11.08.2026
Oxunuş sayı: 46
