İlham Əliyevin Trampa təbrik məktubunda siyasi mesajlar – münasibətlərdə yeni mərhələ
Azərbaycan Prezidenti İlham Əliyevin ABŞ Prezidenti Donald Trampa ABŞ-nin müstəqilliyinin 250-ci ildönümü münasibətilə ünvanladığı təbrik məktubu yalnız diplomatik nəzakət nümunəsi deyil, eyni zamanda iki ölkə arasında münasibətlərin hazırkı vəziyyətini və gələcək inkişaf istiqamətlərini əks etdirən mühüm siyasi mesajlarla zəngindir. Məktubda yer alan fikirlər Azərbaycan-ABŞ tərəfdaşlığının strateji əhəmiyyətini, qarşılıqlı etimadın möhkəmləndiyini və əməkdaşlığın yeni mərhələyə qədəm qoyduğunu nümayiş etdirir. Prezident İlham Əliyev təbrik məktubunda Azərbaycan ilə ABŞ arasında münasibətlərin yüksələn xətlə və uğurla inkişaf etməsinin məmnunluq doğurduğunu vurğulayaraq, ikitərəfli əlaqələrin qarşılıqlı hörmət və ortaq maraqlar əsasında inkişaf etdiyini diqqətə çatdırıb. Həqiqətən də Donald Tramp administrasiyasının hakimiyyətə qayıtmasından sonra iki dövlət arasında münasibətlərdə normallaşma və canlanma müşahidə olunur. Bu dövrdə siyasi dialoq intensivləşib, yüksək səviyyəli təmasların sayı artıb, enerji, iqtisadiyyat, təhlükəsizlik, nəqliyyat, investisiya və digər istiqamətlər üzrə əməkdaşlığın genişləndirilməsi üçün yeni imkanlar yaranıb. Hazırda tərəflər arasında müxtəlif sahələri əhatə edən əməkdaşlıq mexanizmləri formalaşır və ikitərəfli münasibətlər daha praqmatik və qarşılıqlı faydaya əsaslanan məcrada inkişaf edir.
Mövzu ilə bağlı ekspertlər Crossmedia.az-a açıqlama verib:
Milli Məclisin deputatı Fariz İsmayılzadə qeyd edib ki, Donald Tramp administrasiyası işə başlayandan sonra müəyyən irəliləyişlər müşahidə edirik: “Çox ciddi strateji əməkdaşlıqlar baş verir. Həm Vaşinqtonda imzalanan sülh sazişləri, həm də strateji partnyorluq iki ölkə arasında yeni səhifə açıb. ABŞ vitse-prezidenti Cey Di Vensin Azərbaycana səfəri zamanı da strateji partnyorluq sənədində hərəkət istiqamətləri müəyyənləşdirildi. Biz görürük ki, Trampın regiona münasibəti daha praktik, praqmatik və əməkdaşlığa yönəlmiş münasibətdir. Azərbaycan da bundan istifadə edərək ikitərəfli münasibətləri yüksək səviyyəyə qaldırır”.
İqtisadçı Eyyub Kərimli isə qeyd edib ki, ABŞ ilə Azərbaycan arasında iqtisadi ticarət dövriyyəsi 2025-ci ilin göstəricilərinə əsasən 1 milyard 600 milyon dollara yaxındır: “ABŞ və Azərbaycan müxtəlif istiqamətlər üzrə ciddi iqtisadi əməkdaşlıqlar həyata keçirir. Burada həm yaşıl texnologiyalar, enerji sahəsi, həm də yeni İT texnologiyaları istiqamətində mühüm əməkdaşlıq mövcuddur. Digər tərəfdən Donald Tramp administrasiyası Azərbaycanla əməkdaşlığa ciddi siyasi dəstək verir. Bu da gələcəkdə ölkəmizin xarici ticarət dövriyyəsinin artmasına, iqtisadi əlaqələrin daha da genişlənməsinə, eləcə də Zəngəzur dəhlizinin açılmasına ciddi töhfə verə bilər. Bu gün ABŞ və Azərbaycan siyasi müstəvidə də çox ciddi əməkdaşlıq həyata keçirirlər”.
İqtisadçı əlavə edib ki, ABŞ ilə Azərbaycan arasında gələcəkdə iqtisadi əlaqələrin daha da genişləndirilməsi üçün böyük perspektivlər mövcuddur: “Bu, əsasən neft-kimya, qaz sənayesi, enerji resursları sahəsi, eyni zamanda sənaye istehsalı və sənaye investisiyaları, həmçinin logistika və nəqliyyat sektorlarında özünü göstərəcək. Bu istiqamətlərdə əməkdaşlığın genişlənməsi üçün kifayət qədər imkan və perspektiv var. ABŞ ilə Azərbaycan arasında gələcəkdə iqtisadi əlaqələrin daha da genişləndirilməsi və şaxələndirilməsi imkanları daha da artacaqdır”.
Ayhan
12:12 07.07.2026
Oxunuş sayı: 75
