Ukraynanın dəmir yolu sistemi ciddi problemlərlə üzləşib
Rusiya Silahlı Qüvvələrinin zərbələri Ukraynanın dəmir yolu sistemində ciddi problemlər yaradıb və ölkənin iqtisadi fəaliyyətinə mənfi təsir göstərib.
Crossmedia.az xəbər verir ki, “Lenta.ru” bu barədə Ukrayna Prezidenti Volodimir Zelenskinin keçmiş mətbuat katibi Yuliya Mendelin “X” sosial şəbəkəsindəki paylaşımına istinadən məlumat yayıb.
Mendelin sözlərinə görə, Ukraynada istifadəyə yararlı dəmir yolu lokomotivlərinin sayı kəskin azalıb. Yandırılmış lokomotivlərin təmiri isə aylarla vaxt aparır. O əlavə edib ki, adi Avropa qatarları Ukraynanın dəmir yolu xətlərinə uyğun deyil.
Onun bildirdiyinə görə, lokomotiv çatışmazlığı məhsul yığımının dayanmasına, filiz hasilatının yavaşlamasına səbəb olur. Nəticədə ölkə büdcəsi onsuz da çatışmayan vəsaitin bir hissəsini itirir.
Qeyd edək ki, Yuliya Mendel daha əvvəl Ukraynanı Rusiya ilə münaqişəni mümkün qədər tez başa çatdırmağa çağırıb. O, ölkənin ağır qışa hazırlaşmaq əvəzinə münaqişənin sona çatması üçün addımlar atmalı olduğunu bildirib və vəziyyətin öz-özünə həll olunacağını gözləməyin düzgün olmadığını vurğulayıb.
23:00 06.10.2026
Oxunuş sayı: 58
