Liviyada hücuma məruz qalan Rusiya hərbi gəmisi ilə bağlı yeni təfərrüatlar açıqlanıb
Liviyada pilotsuz uçuş aparatlarının hücumuna məruz qalan Rusiya hərbi gəmisi yanacaq doldurmaq və ehtiyat təchizat götürmək üçün Benqazi limanında dayanıb.
Crossmedia.az xəbər verir ki, bu barədə Liviya hökuməti “X” sosial şəbəkəsində məlumat yayıb.
Bildirilib ki, gəmi Rusiyaya qayıtmazdan əvvəl Benqazidə yanacaq doldurmaq və lazımi ehtiyatları götürmək üçün dayanıb.
“Naval News” ixtisaslaşmış portalının məlumatına görə, hücuma məruz qalan gəmi Rusiyaya məxsus “Merkuri” korvetidir. Peyk görüntülərinə istinad edən portal gəminin, demək olar ki, məhv edildiyini ehtimal edir.
Qeyd edək ki, Liviya hakimiyyəti noyabrın 22-də hərbi bazanın ərazisində baş verən hadisə barədə məlumat yayıb. İlkin araşdırmalara əsasən, partlayış gəminin göyərtəsində baş verib. Həmin vaxt Rusiya hərbi gəmisi limanda dayanıb.
Liviya hökuməti hadisənin bütün təfərrüatlarının müəyyənləşdirilməsi üçün hərtərəfli araşdırmaya başlanıldığını və bu prosesdə Rusiya tərəfi ilə əməkdaşlıq ediləcəyini bildirib.
Rusiya Müdafiə Nazirliyi isə hadisə ilə bağlı hələlik açıqlama verməyib.
19:26 22.11.2026
Oxunuş sayı: 35