Çin ABŞ-yə xəbərdarlıq etdi: Telekommunikasiya müharibəsində yeni gərginlik
Çin ABŞ-ni Çin telekommunikasiya şirkətlərinə qarşı yeni məhdudiyyətləri geri götürməyə çağırıb. Pekin Vaşinqtonun bu addımını ayrı-seçkilik və haqsız rəqabət kimi qiymətləndirərək, milli maraqlarını qorumaq üçün zəruri tədbirlər görəcəyini bəyan edib.
Crossmedia.az xəbər verir ki, bu barədə Çinin Ticarət Nazirliyinin nümayəndəsi açıqlama verib.
Bildirilib ki, ABŞ Federal Rabitə Komissiyası (FCC) milli təhlükəsizlik məsələsini əsas gətirərək Çin şirkətlərinin fəaliyyətinə əsassız müdaxilə edir və tənzimləyici səlahiyyətlərindən sui-istifadə edir.
Qeyd edək ki, noyabrın 19-da FCC Çin telekommunikasiya şirkətləri – “China Mobile”, “China Telecom” və “China Unicom”un ABŞ telefon nömrələrinə birbaşa çıxışını məhdudlaşdıran təklifi qəbul edib. Vaşinqton bu addımı milli təhlükəsizlik maraqları ilə əsaslandırıb.
Pekin hesab edir ki, bu qərar iki ölkə liderləri arasında əldə olunmuş razılaşmalarla ziddiyyət təşkil edir və Çin-ABŞ iqtisadi-ticarət münasibətlərinin sabitliyinə təhlükə yaradır.
Çin tərəfi Vaşinqtonu məhdudiyyətləri dərhal ləğv etməyə və fikir ayrılıqlarını məsləhətləşmələr yolu ilə həll etməyə çağırıb.
14:00 22.11.2026
Oxunuş sayı: 57