Putin və Si Cinpin arasında mühüm görüş keçiriləcək
Rusiya Prezidenti Vladimir Putinlə Çin Prezidenti Si Cinpin arasında görüş noyabr ayında Çinin Şençjen şəhərində keçiriləcək Asiya-Sakit Okean İqtisadi Əməkdaşlığı (APEC) sammiti çərçivəsində baş tutacaq.
Crossmedia.az xəbər verir ki, “TASS” bu barədə Rusiya prezidentinin köməkçisi Yuri Uşakova istinadən məlumat yayıb.
Uşakov bildirib ki, Putinlə Si Cinpin arasında görüşün keçirilməsi ilə bağlı razılıq əldə olunub. Onun sözlərinə görə, Rusiya lideri APEC sammitində Çin lideri ilə mütləq görüşəcək.
Rusiya prezidentinin köməkçisi həmçinin Putin, Si Cinpin və ABŞ Prezidenti Donald Trampın üçtərəfli görüşünün keçirilməsi ideyasını “çox maraqlı” adlandırıb. O qeyd edib ki, belə bir görüşün baş tutması əsasən Trampın sammit tədbirlərində iştirakından asılıdır.
Uşakovun sözlərinə görə, hazırda ABŞ liderinin sammitdə iştirakına dair yekun təsdiq yoxdur.
Qeyd edək ki, Vladimir Putin daha əvvəl Putin, Si Cinpin və Tramp arasında mümkün üçtərəfli görüşlə bağlı danışarkən belə formatda danışıqların faydalı olduğunu bildirib. Onun sözlərinə görə, bu cür görüşlər tərəflərə fikir mübadiləsi aparmaq imkanı verir.
20:36 06.10.2026
Oxunuş sayı: 50
