Azərbaycanla Gürcüstan arasında hərbi sahədə əməkdaşlıq region üçün nə vəd edir?
Azərbaycan və Gürcüstan arasında hərbi əməkdaşlığın inkişafı istiqamətində növbəti addımlardan biri kimi “Eternity-2026” kompüter dəstəkli birgə komanda-qərargah təlimi diqqət çəkir. Təlimin “Yüksək Səviyyəli Müşahidəçi Günü”ndə iştirak etmək məqsədilə Gürcüstan Müdafiə Qüvvələri komandanının müavini, general-mayor İrakli Çiçinadzenin rəhbərlik etdiyi nümayəndə heyəti ölkəmizdə səfərdədir.
Müasir dövrdə hərbi güc yalnız canlı qüvvə və silah arsenalı ilə deyil, həm də texnoloji imkanlar, rəqəmsal idarəetmə sistemləri və peşəkar kadr potensialı ilə ölçülür. Bəs bu gün müasir texnoloji avadanlıqların Azərbaycan ordusunda tətbiqi hansı səviyyədədir? Ordunun texnoloji imkanları qənaətbəxşdirmi? Ən son hərbi texnologiyalardan və yüksək texnoloji biliklərə malik kadrlardan istifadənin döyüş qabiliyyətinə, əməliyyatların idarə olunmasına və hərbi təhlükəsizliyə hansı üstünlükləri var?

Mövzu ilə bağlı Crossmedia.az-a açıqlama verən hərbi ekspert Emin Həsənli qeyd edib ki, Gürcüstan Azərbaycanın qonşu dövləti olmaqla yanaşı, ölkəmiz üçün strateji əhəmiyyətə malik tərəfdaşlardan biridir: “Azərbaycanın əsas enerji ixrac marşrutlarından olan Bakı-Tbilisi-Ceyhan neft kəməri, Bakı-Tbilisi-Ərzurum qaz kəməri və Bakı-Tbilisi-Qars dəmir yolu xətti Gürcüstan üzərindən keçir. Eyni zamanda, Azərbaycanın Avropa ilə əlaqələrinin mühüm hissəsi də məhz Gürcüstan vasitəsilə həyata keçirilir. Azərbaycan və Gürcüstan arasında iqtisadi, elmi, mədəni, siyasi və hərbi sahələrdə geniş əməkdaşlıq mövcuddur. Bu baxımdan, xüsusilə hərbi sahədə, eləcə də müasir texnoloji avadanlıqların istehsalı, tətbiqi və istifadəsi istiqamətində əməkdaşlığın inkişaf etdirilməsi məqsədəuyğundur”.
Ekspert qeyd edib ki, bu gün texnoloji tərəqqi sürətlə davam edir və biz bu dəyişiklikləri gündəlik həyatımızda, istifadə etdiyimiz cihazlarda və müxtəlif avadanlıqlarda da müşahidə edirik: “Təbii ki, texnoloji yeniliklərin ilk və ən mühüm tətbiq sahələrindən biri də hərbi sektordur. Çünki hər bir dövlət öz ordusunun döyüş qabiliyyətini artırmağa, müasir texnologiyalara çıxış imkanlarını genişləndirməyə və ən yeni hərbi avadanlıqları silahlanmaya daxil etməyə çalışır”.
Ayhan
20:54 20.11.2026
Oxunuş sayı: 97