Danimarkada ukraynalı reperə sui-qəsd hazırlayan şəxslər saxlanılıb
Danimarkada ukraynalı reper Albert Vasilyevə, səhnə adı ilə Kiyevstonerə qarşı sui-qəsd hazırlamaqda şübhəli bilinən iki nəfər saxlanılıb. İstintaqın versiyasına görə, onlar Rusiya kəşfiyyatının tapşırığı ilə hərəkət ediblər.
Crossmedia.az xəbər verir ki, məlumata görə, Rusiya xüsusi xidmət orqanları iki Danimarka vətəndaşını Kiyevstoneri öldürmək üçün cəlb edib. Sui-qəsdin reperin sentyabrın 25-də Kopenhagendə keçirilməsi planlaşdırılan konsertindən əvvəl həyata keçirilməsi nəzərdə tutulub.
Çıxışdan qısa müddət əvvəl polis şübhəliləri Hellerup rayonunda avtomobildə saxlayıb. Avtomobilə baxış zamanı silah aşkarlanıb. Hadisədən sonra konsert ləğv edilib. Reper həmin vaxt Danimarka xüsusi xidmət orqanlarının ona səhnəyə çıxmağı qadağan etdiyini bildirmişdi.
Sentyabr ayından həbsdə saxlanılan hər iki şəxs ittihamları qəbul etmir.
Ehtimal olunan sui-qəsd planı barədə məlumat noyabrın 20-də Lyunqby şəhərində keçirilən məhkəmə iclasında açıqlanıb. Polis daha iki nəfəri də saxlayıb, lakin onların reperə qarşı sui-qəsdin hazırlanmasında şübhəli bilinmədiyi bildirilir.
İstintaqın ehtimal etdiyi sifarişin detalları və sui-qəsdin hazırlanma şəraiti hələlik açıqlanmayıb.
Qeyd edək ki, avqust ayında Polşada da Kiyevstonerə qarşı sui-qəsd cəhdinin qarşısının alındığı bildirilmişdi. RMF FM radiostansiyasının məlumatına görə, avqustun 7-də saxlanılan Rusiya vətəndaşı reperə qarşı hücum hazırlamaqda şübhəli bilinirdi.
Polşanın Baş naziri Donald Tusk həmin vaxt Varşavada Ukrayna və ABŞ vətəndaşlığı olan bir şəxsin qətlə yetirilməsinin qarşısının alındığını açıqlamış, lakin onun adını açıqlamamışdı.
20:56 20.11.2026
Oxunuş sayı: 92