Ermənistan hərbi xərclərini artırır: Region üçün hansı təhlükə var?
Ermənistanın 2027-ci il üçün müdafiə xərclərini 147,22 milyon dollar artıraraq təxminən 1,71 milyard dollara çatdırması regionda diqqət çəkən məsələlərdən biridir. Ümumiyyətlə, son dövrlərdə dünyada hərbi büdcələrin artırılması tendensiyası müşahidə olunur və Cənubi Qafqaz da bu prosesdən kənarda qalmır. Ermənistanın bu qərarının arxasında hansı hərbi-siyasi və strateji məqsədlərin dayandığı maraq doğurur. Rəsmi İrəvan müdafiə xərclərini artırmaqla öz hərbi potensialını gücləndirməyə, yoxsa təhlükəsizlik siyasətində yeni yanaşma formalaşdırmağa çalışır? Digər tərəfdən, bu artımın region ölkələrinin hərbi büdcələri ilə müqayisədə hansı səviyyədə olduğunu və regional hərbi balans baxımından nə ifadə etdiyini də qiymətləndirmək vacibdir.
Mövzu ilə bağlı Crossmedia.az-a açıqlama verən hərbi ekspert Asəf Quliyev qeyd edib ki, Ermənistanın müdafiə xərclərini artırması diqqət çəkən məqamlardan biridir: “Lakin xüsusi qeyd etmək lazımdır ki, hazırda bütün dünyada hərbi xərclərin artırılması tendensiyası müşahidə olunur. İstər Avropa ölkələrində, istər Qafqaz regionunda, istərsə də Orta Asiyada bu istiqamətdə müəyyən artımlar qeydə alınır. Bu, heç də arzuolunan tendensiya deyil, lakin mövcud reallıqdır. Ermənistanın hərbi büdcəsini digər region ölkələri ilə müqayisə etdikdə isə nəzərə almaq lazımdır ki, hər bir addımın arxasında müəyyən məqsədlər dayanır. Bu baxımdan, Ermənistanın müdafiə xərclərini artırması bizim üçün də maraq doğuran məsələlərdəndir. Bununla belə, hesab edirəm ki, hazırkı mərhələdə Ermənistanın hərbi büdcəsinin artırılması nə Azərbaycan, nə də regionun digər dövlətləri üçün ciddi təhlükə yaradacaq səviyyədədir”.

Asəf Quliyev qeyd edib ki, regionda İran və Türkiyə kimi böyük hərbi potensiala malik dövlətlər var: “Ermənistan müdafiə xərclərini nə qədər artırsa da, onun hərbi imkanları bu ölkələrlə müqayisə ediləcək səviyyədə deyil. Eyni zamanda, Azərbaycanla da müqayisə aparmaq mümkün deyil. Azərbaycanın hərbi potensialı və qüdrəti Ermənistanın imkanlarından xeyli yüksəkdir. Müqayisə aparıla biləcək digər ölkə Gürcüstandır. Gürcüstanda hərbi xərclərin artırılması tendensiyası hazırda daha aşağı səviyyədə müşahidə olunur. Ermənistanda isə müdafiə xərclərinə meyil daha qabarıqdır. Hesab edirəm ki, bu tendensiya hazırkı Ermənistan hökumətinin, xüsusilə də Baş nazir Nikol Paşinyanın yürütdüyü siyasətin elementlərindən biridir. Belə ki, Ermənistan dünənə qədər öz müdafiə və təhlükəsizlik sistemini, demək olar ki, Rusiyanın təhlükəsizlik arxitekturasının bir hissəsi kimi formalaşdırmışdı. Lakin bu gün Paşinyan Ermənistanı Rusiya təhlükəsizlik sistemindən uzaqlaşdırmağa ciddi cəhd göstərir. Kollektiv Təhlükəsizlik Müqaviləsi Təşkilatı (KTMT) ilə münasibətlərdəki vəziyyət, eləcə də Moskva ilə münasibətlərdə müşahidə olunan dəyişikliklər bunun göstəricisidir. Görünür, Ermənistan hərbi xərclərini artırmaqla öz müdafiəsini və təhlükəsizliyini müstəqil şəkildə təmin etmək xəttini seçib. Hesab edirəm ki, bu prosesi məhz həmin kontekstdə qiymətləndirmək lazımdır”.
Ayhan
20:25 19.11.2026
Oxunuş sayı: 43