Avropa TikTok-u Çindən almaq istəyir — Platformanın sahibi dəyişə bilər
Almaniya və Avstriya hökumət nümayəndələri TikTok-un Avropadakı biznesinin Avropa İttifaqından olan sahiblərə verilməsi təşəbbüsü ilə çıxış ediblər.
Crossmedia.az xəbər verir ki, bu barədə "Politico" məlumat yayıb.
Təşəbbüs Almaniyanın media məsələləri üzrə naziri Volfram Vaymer və Avstriyanın rəqəmsallaşma üzrə dövlət katibi Aleksandr Prell tərəfindən irəli sürülüb.
Nazirlərin fikrincə, platformanın mülkiyyət strukturunun dəyişdirilməsi Avropa istifadəçilərinin şəxsi məlumatlarının qorunmasına, qitənin rəqəmsal suverenliyinin gücləndirilməsinə və demokratik cəmiyyət üçün yarana biləcək risklərin azaldılmasına kömək edə bilər.
Onlar narahatlıqlarının əsas səbəbi kimi TikTok-un sahibi olan Çinin “ByteDance” şirkətini və Çin dövlətinin Avropa istifadəçilərinin məlumatlarına mümkün çıxışını göstəriblər.
Məlumata görə, Avropa İttifaqında TikTok-un təxminən 200 milyon istifadəçisi var.
TikTok nümayəndəsi isə təklifin heç bir əsasının olmadığını bildirib.
Qeyd edək ki, 2025-ci ildə İrlandiyanın məlumatların qorunması üzrə tənzimləyici qurumu Avropa istifadəçilərinin məlumatlarının Çinə ötürülməsi ilə bağlı TikTok-u 530 milyon avro cərimələmişdi. Hazırda Avropa İttifaqı platformanın seçkilərə mümkün təsirini də araşdırır.
Nazirlər digər Avropa İttifaqı ölkələrini də təşəbbüsə dəstək verməyə çağırıblar. Təklifin həyata keçirilmə mexanizmi isə hələlik açıqlanmayıb.
19:27 19.11.2026
Oxunuş sayı: 39