Finlandiyada “Google”un iki data mərkəzinin tikintisi dayandırıldı
Finlandiyada “Google”un iki data mərkəzinin tikintisi dayandırılıb
Crossmedia.az xəbər verir ki, “BBC” bu barədə məlumat yayıb.
Finlandiya hakimiyyəti 300 hektardan çox meşənin qırılması ilə bağlı narahatlıqlar fonunda “Google” şirkətinin planlaşdırdığı iki data mərkəzinin tikinti işlərini dayandırıb.
Bu layihələr “Google”un Finlandiyaya rekord məbləğdə – 13 milyard avro sərmayə yatırmaq planının bir hissəsidir. Şirkət bu investisiyanı bir aydan az əvvəl açıqlayıb və Avropada həyata keçirdiyi ən böyük birdəfəlik sərmayə kimi təqdim edib.
Finlandiya Nəzarət Agentliyi (LVV) bildirib ki, obyektlərdən birində işlər məcburi ekoloji qiymətləndirmə aparılmadan həyata keçirilib. Agentlik ətraf mühitə ciddi təsir göstərə biləcək işlərin oktyabrın 23-dək dayandırılmasını tələb edib.
“Google” məsələ ilə bağlı açıqlamasında bu vəziyyətdə şirkətin öz yüksək standartlarına cavab verə bilmədiyini bildirib və agentliyin tələblərinə əməl edəcəyini açıqlayıb.
Tələblər Muhos və Kajaani şəhərlərində planlaşdırılan data mərkəzlərinin ərazilərində aparılan hazırlıq işlərinə aiddir. LVV-nin ətraf mühit üzrə rəhbəri Tommi Muilunun sözlərinə görə, ərazilərdə ağacların və üst torpaq qatının təmizlənməsi, yolların və saxlama sahələrinin salınması, eləcə də xəndəklərdə dəyişikliklər həyata keçirilib.
“Google”un data mərkəzi layihələrini həyata keçirən “Tuike Finland” şirkətindən oktyabrın 14-dək görülən işlərlə bağlı izahat verməsi və layihənin necə davam etdiriləcəyini açıqlaması tələb olunub. Agentlik tələblərə əməl edilmədiyi halda şirkətə qarşı hüquqi tədbirlərin başlanıla biləcəyini bildirib.
Finlandiya Təbiəti Mühafizə Assosiasiyasının rəhbəri Hanna Halmeenpaa daha əvvəl AFP-yə açıqlamasında qorunmalı olan təbiət ərazilərində ağacların kəsildiyini deyib. Təşkilat ekoloji tələblər araşdırılanadək işlərin dayandırılmasını tələb edib.
“Google” isə bildirib ki, şirkət “Meşəçilik haqqında” qanunun tələblərinə uyğun və xoş niyyətlə fəaliyyət göstərib, ərazidə təbiətlə bağlı araşdırmalar aparıb və ekoloji baxımdan yüksək dəyərə malik sahələrin qorunması üçün tədbirlər görüb.
22:05 06.10.2026
Oxunuş sayı: 60
