Şuşada "SİNA - İslam ölkələrinin gənc alimlərinin forumu” keçirilib
Gənc alimlər islam dünyasında elmi yüksək səviyyədə təmsil etməlidirlər”.
Bunu "SİNA - İslam ölkələrinin gənc alimlərinin forumu”nda açılış nitqi ilə çıxış edən AMEA-nın vitse-prezidenti Dilqəm Tağıyev deyib:
"Ölkəmizdə hazırda 51 universitetdə 320 mindən artıq ali təhsil alan insan var. Onların 96 faizi gənclərdir. Azərbaycanda 134 elmi müəssisə var və bu müəssisələrdə 14 min tədqiqatçı fəaliyyət göstərir. Onların da əksər hissəsini gənclər təşkil edir”.
"Azərbaycanın mirvarisi, mədəniyyət paytaxtı Şuşada belə bir tədbirin keçirilməsi təqdirəlayiq addımdır və bu tədbirlər gələcəkdə gənclər arasında əməkdaşlığın güclənməsində mühüm rol oynayacaq", - deyə o bildirib.
O həmçinin, qeyd edib ki, "Gənclər paytaxtı" tədbirlərində 29 ölkədən 200-dən çox əcnəbi gənc iştirak edir.
Gənclər və İdman Nazirliyi, İslam Əməkdaşlıq Təşkilatının Gənclər Forumu və Mədəniyyət Nazirliyinin birgə təşkilatçılığı ilə keçirilən forumda çıxış edən Gənclər və İdman Nazirliyi Gənclərlə İş şöbəsinin müdiri Ramil Cabbarov qeyd edib ki, innovasiyalar, yenilikləri və gənc alimləri bir araya gətirən bu forum qaynar müzakirələr nöqtəsi olacaq, gələcək əməkdaşlıqlara təkan verəcək.
Qeyd edək ki, forum dekabrın 4-də yekunlaşacaq.(APA)
09:21 03.12.2024
Oxunuş sayı: 16692
