Afaq Bəşirqızı bu dəfə Zal qızı Zalxa obrazı ilə pərəstişkarlarını sevindirəcək

30 və 31 yanvar tarixlərində Azərbaycan Dövlət Akademik Musiqili Teatrında “Şərəf” və “Şöhrət” ordenli Xalq artisti Afaq Bəşirqızının iştirakı ilə “Zal qızı Zalxa” komediyasının premyerası təqdim olunacaq. 

Yazıçı-dramaturq Əli Əmirlinin “Yeddi məhbusə anası” pyesi əsasında ərsəyə gələn tamaşanın bəstəkarı Əməkdar incəsənət xadimi Cavanşir Quliyev, quruluşçu rejissoru Prezident mükafatçısı Samir Qulamovdur. Tamaşanın süjeti polis məntəqəsinin müvəqqəti saxlama təcridxanasında baş verən tragikomik hadisələr üzərində qurulub.  Dəmir barmaqlıqlar arxasında saxlanılan yeddi  məhbus qadın və onları qorumağa çalışan ananın duzlu-məzəli əhvalatı tamaşaçılara gülüş dolu anlar bəxş edəcək. Komediyada ana fədakarlığı, qadın taleyi, ailə və cəmiyyət arasındakı bağların möhkəmliyi də ön plana çəkilir. Səhnə əsərinin quruluşçu dirijoru Əməkdar incəsənət xadimi Fəxrəddin Atayev, quruluşçu rəssamı Vüsal Rəhim, quruluşçu baletmeysteri Əməkdar artist  Nigar Şahmuradova,  dirijoru Səməd Süleymanlı, xormeysteri Məlahət Qasımova, konsertmeysteri Fidan Məmmədova, rejissor assistenti Razimə İsmayılovadır.

 Tamaşada Xalq artisti ilə yanaşı, Əməkdar artist Əzizağa Əzizov (Babək), Prezident mükafatçısı Ülviyyə Əliyeva (Nigar), aktyorlar Hüseyn Əlili (Polis Aslan), Gülcahan Salamova (Həcər), Türkel Tariqpeyma (Nüşabə) Ofeliya Məmmədova (Tomris), Gültac Əlili (Ərəbi), Gülnarə Əzizova (Qüdrət), Nərmin Əliyeva və Nigar Rüstəmova (Şöhrət), Cəbrayıl Cəbrayılov (arabadakı adam), həmçinin teatrın xor və balet artistləri iştirak edəcəklər.

  Xatırladaq ki, aktrisa bu obrazı 2007-ci ildə Əməkdar incəsənət xadimi Oruc İzzətoğlunun quruluşunda da uğurla ifa edib.

"Mən çox istərdim ki, Cavanşir Quliyev öz doğma vətənində diqqət və qayğı ilə əhatə olunsun, dövlət başçımızın və müvafiq dövlət nümayəndələrinin diqqətində olsun və layiq olduğu yüksək dəyəri alsın"

Bu sözləri Xalq artisti Afaq Bəşirqızı  jurnalistlərə müsahibəsində   deyib:

" Dirijorumuz son dərəcə peşəkar, həddindən artıq diqqətli, xüsusi yanaşması olan və istedadlı sənətkardır. Bütün bu keyfiyyətlər Fəxrəddin bəyə çox yaraşır. Dirijorumuz məhz odur. Baletimiz öz gözəl rəqsləri və yüksək səviyyəli quruluşları ilə seçilir. Rəqs quruluşları Nigar xanıma məxsusdur. O, çox istedadlı baletmeysterimizdir. Əminəm ki, bu gün zalda heç kim darıxmayacaq. Əksinə, böyük bir bayram əhval-ruhiyyəsi hökm sürəcək. Bu gün hamımız sevinəcəyik. Arzu edirəm ki, gün o gün olsun — bütün teatr və incəsənət aləmi bugünkü gün qədər məsuliyyətli və sevincli olsun".

 Qeyd edək ki, ARB televiziyasında yayımlanan və Fikrət Dəmirovun manyak obrazını canlandırdığı 8 serialı ilə bağlı bir məsələ gündəmə gəlmişdi. Serialın ilk bölümü qeyri-etik ifadələrə görə müəyyən səbəblərdən həm efirdə, həm də YouTube platformasında dayandırılmışdı. Xalq artisti bu barədə də fikrini bildirib:

"Bu, vəziyyətdən asılı olan məsələdir. Hikmət çox təbii, səmimi aktyordur, həm də olduqca istedadlı insandır. Mən onun “Alatava” layihəsinə də baxmışam, pərdəarxası qurduğu tamaşaları da izləyirəm. Ümumilikdə bu filmləri maraqla izləyirəm və onlara böyük rəğbət bəsləyirəm. Niyə? Çünki elə vəziyyətlər olur ki, insan emosiyalarını gizlədə bilmir. Bəzən istər-istəməz deyirsən: “Axı belə olmaz. Mən artıq boğaza yığılmışam. Mən də insanam, mən də qadınam. Ayıb olsun sənə! Utanmadın məni bu vəziyyətdə qoymağa?” Bu, aktyorun obrazdan irəli gələn reaksiyasıdır. Bəli, həmin səhnələrdə müəyyən ifadələr montaj edilə bilərdi. Amma bu gün tamaşaçıların əksəriyyəti “Eşref Rüya” serialına baxır. Orada Əşrəfin ən yaxın dostlarından biri qeyri-etik ifadə işlətdi və həmin hissə kəsilmədi. Niyə? Çünki real vəziyyət bunu tələb edirdi və həyatın içindən gəlirdi. Məhz buna görə mən bu mövqenin tərəfdarıyam. ARB-yə qarşı düzgün addım atılmadı. Ola bilər ki, montaj edən şəxs sənət adamı olduğu üçün həmin səhnəyə toxunmayıb.

Xüsusilə qeyd etmək istəyirəm ki, rəssamımız Vüsalı teatrda tapdığımız üçün çox sevinirik. Qulamov onu təxminən 8 ay axtarmışdı. Vüsal son dərəcə məşğul sənətkardır  Qarabağ mövzusundan tutmuş, bir çox dəyərli əsərlərimizin səhnə quruluşlarını məhz o həyata keçirir".

Prezident mükafatçısı, Azərbaycan aktyoru, quruluşçu rejissor, ssenarist və prodüser Samir Qulamov dramatik tamaşaların  rejissoru olduğunu qeyd edərək deyib:

"Bir neçə tamaşalarda,  həmçinin, "Leyli və Məcnun" tamaşasında olmuşam. Əslində mən  bu komediya ilə bağlı qorxurdum. Çünki komediyanın biraz çətin olduğu deyilirdi. Tamaşanın əslində üslubu həm romantik komediya,  həm dramatik komediyadır.  Afaq xanım  kimi sənətkarla işləmək mənim üçün bir sənətkar kimi qürurvericidir".

Rejissor dram janrinda  çox yazdığına  deyə komediya janrına toxunmağın biraz çətin olduğunu,  lakin prosesin içində heyətin motivasiyası ilə bacara bildiyini qeyd edib:"Heyətin köməyi çox oldu  mənim üçün".

 Akademik Musiqili Teatrın baş dirijoru,  Əməkdar İncəsənət xadimi Fəxrəddin Atayev  bildirib ki,  Əli Əmirlinin  "Yeddi Məhbusə anası"   pyesi əsasında artıq ikinci dəfədir bizim səhnəmizdə təqdim ediləcək:

"Cavanşir Quliyevin musiqisi əsasında  musiqili komediya janrında yazılmış əsərdir. Əsər 2002-ci ildə bəstəkar tərəfindəm bəstələnmişdir. Adından göründüyü kimi,  əsər komediya janrındadır. Və hər birimizin sevimlisi Afaq Bəşirqızı baş roldadır. Yeni quruluşda adı "Zalxa"dır".

Rejissor həmçinin əsərin çox axıcı, maraqlı,  aktual  səhnələrlə zəngin  olduğunu bildirib.

Azərbaycan Dövlət Musiqili Akademik Teatrının  aktrisası Gülcahan Salamova canlandırdığı  obrazı barədə fikirlərini bölüşüb:

"Obrazım barədə onu deyə

bilərəm ki, çox şirin,  çox baxımlı və gözəl roldur. Şükür ki,   bunun öhdəsindən gələ bilirəm. Bu tamaşanı canlandırmağım birinci dəfə deyil, Ülviyyə xanımla, Afaq xanımla birlikdə  bir neçə il oynamışıq. Müəyyən səbəblərə görə fasilə yaranıb. Obrazımın adı Həcərdir. Həcər öz ərinə sadiq bir xanımdır. Türməyə düşmüş halda belə digər 6 bacıdan fərqli olaraq  ailəsinə,  yaxınlarına,  Səmədə "ay Səməd" deyə sevgisini göstərir".

Aktyor Hüseyn Əlili  Canangir Quliyevin və  Əli Əmirlinin  birgə ərsəyə gətirdiyi bu əsərdə polis obrazını canlandırdığı bildirib. O teatr sahəsindəki inkişafdan danışıb:

"Ümumiyyətlə, teatr  hər zaman inkişaf edib və inkişaf etməkdədir. Həm komediya, həm dram- müxtəlif janrlarda tamaşalar sərgilənir. Təbii ki,  bu da böyük inkişafdır. Mən komediya oynamışamsa bu günki gündə  tamaşaçılarda bəyənirsə bu böyük qazancdır".

Aktrisa Ülviyyə Əliyevanin sözlərinə görə isə  premyera hər bir teatr üçün böyük bir bayramdır:

" Bu  çox böyük məsuliyyət və şərəfdir ki, Afaq xanım mənim ustadım olub. "Zal qızı Zalxa" tamaşasının ilk dəfəsindən bəri "Nigar" obrazında idim və bunun üçün  çox sevinirəm. İndi də canlandıranda 2007-ci ilə  qayidiram sanki.  Canlandırdığım obraz çox gözəl qadındır . Dinindən , Quranından... Bütün günü əlim dualıdır. Tamaşa boyu istedadlılarımızın səhnədə olur. Tamaşada   gülüş  dolu hissələr var. Sonda belə tamaşaçıları sürpriz gözləyir".

Ü.Əliyeva Afaq Bəşirqızının   onlara hər zaman dəstək olduğunu bildirib: "Həmişə çiyin çiyinə işləməyimizi istəyirəm".

Fatimə Məmmədova

Pərvin Hacıyeva