Gündəm,Xarici xəbərlər
Gürcüstan Azərbaycandan Ermənistana neft tranzitindən rüsum alacaq
Gürcüstan Azərbaycandan Ermənistana neft məhsullarının ikinci tranziti üçün rüsum alacaq.
Crossmedia.az xəbər verir ki, bunu "Mega Trade" şirkətinin direktoru Karen Hayriyan NEWS.am-a verdiyi müsahibədə açıqlayıb.
O əlavə edib ki, bu dəfə təkcə "Premium" benzin deyil, həm də "Adi" benzin idxal olunacaq. Bunun benzinin qiymətinə necə təsir edəcəyi soruşulduqda, Hayriyan belə cavab verib: "Mal gələndə maya dəyərini hesablayacaq və benzini nə qədərə satacağımızı müəyyən edəcəyik. Benzinin qiymətinə təsir edən digər amillər də var. Beynəlxalq qiymətlərdəki dəyişikliklər və gündəlik valyuta məzənnəsinin dəyişməsi vacibdir. Qiymətə yalnız tranzit məbləği təsir etmir. Düşünmürəm ki, tranzit haqqının alınması qiymətə əhəmiyyətli dərəcədə təsir edəcək. Müəyyən təsir olacaq, amma nəzərəçarpacaq fərq olmayacaq".
"Mega Trade" direktorunun sözlərinə görə, həm keçən dəfə, həm də bu dəfə onlar benzini ticarət şirkətindən alıblar. Sonuncu ilə davamlı əməkdaşlıq müqaviləsi imzalayıb-imzalamadıqları soruşulduqda, o, "Neft məhsulları bazarında müqavilələr adətən hər göndəriş üçün yenilənir. Biz bu şirkətə sadəcə başqa bir təchizatçı kimi baxırıq. Əgər kommersiya təklifi əlverişsiz olarsa, biz almayacağıq. Onlar rəqabətli qiymət təklif etdilər, ona görə də biz razılaşdıq" cavabını verib.
Ayriyan qeyd edib ki, hər iki şirkət birlikdə bir neçə min ton Azərbaycan benzini idxal edir.
Qeyd etmək lazımdır ki, "Mega Trade" Azərbaycan benzinini idxal edən iki şirkətdən biridir. Şirkət hakim Vətəndaş Müqaviləsi Partiyasından parlament üzvü Xaçatur Sukiasyanın ailəsinə məxsusdur. Azərbaycan benzinini idxal edən digər şirkət isə iş adamı Samvel Aleksanyanın həyat yoldaşının qardaşı oğlu Şoqerin Mkrtçyana məxsus "Shisha World" şirkətidir.
Kübra Musayeva
15:36 08.01.2026
Oxunuş sayı: 1934
